Skip to main content

बैंगन मसाला करी

लेखक सस्नेह यांनी गुरुवार, 16/08/2012 14:14 या दिवशी प्रकाशित केले.

परवा बाजारात फिरताना उन्हाळ्यात गायब असणारी हिरवीगार ताजी रसरशीत कुडची वांगी दिसली. म्हटलं, चला, होऊन जाऊदे झणझणीत कोल्हापुरी बैंगन मसाला करी ! वांगी घेऊन घरी गेले अन लगेच तयारीला लागले.
मसाल्याचं साहित्य जमा केलं.
,
,

१ वाटी सुक्या खोबऱ्याचा कीस २ चमचे ओल्या खोबऱ्याचा चव
४-५ लसूण पाकळ्या १ इंच आले
२ चमचे तीळ १ चमचा मगजबी
हे सगळं १ वाटी पाण्यात अर्धा तास भिजत घातलं अन मग मिक्सर मध्ये वाटून घेतलं. (मी हा मसाला जास्त प्रमाणात तयार करून फ्रीझर मध्ये ठेवते. महिनाभर राहतो. कोणत्याही रश्शात घालता येतो.)
मग १ लहान कांदा बारीक चिरला. २ चमचे कोल्हापुरी चटणी (कोल्हापुरी कांदा लसूण मसाला – मार्केट मध्ये तयार मिळतो), पाव वाटी तेल, चवीपुरते मीठ अन हळद काढून ठेवले.
आता १/२ किलो वांगी धुवून देठे न काढता मध्ये काप दिला.

मग त्यांना बाहेरून थोडे तेल लावून झाकणाच्या भांड्यात ठेवून ४-५ मिनिटे मायक्रोवेव्ह ओव्हनमध्ये हाय मायक्रो करून ठेवली. ३ मिनिटे झाल्यावर बाहेर काढून देठांना धरून फिरवून पुन्हा ठेवली.
आता वांगी अंगच्या पाण्यातच थोडीशी शिजून मऊ झाली.

मग कढईत तेल तापवून कांदा पारदर्शक होईपर्यंत परतून घेतला. आता त्यात हळद व तयार मसाला घालून तेल सुटेपर्यंत परतले.

मग लाल कोल्हापुरी कांदा-लसूण चटणी घालून पुन्हा १ मिनिट परतले.

आता गॅस बंद करून वांग्यांची देठे कापून त्यात यापैकी तीन चतुर्थांश मसाला भरला. उरलेल्या मसाल्यात १ कप गरम पाणी घालून उकळले. आता त्यात भरलेली वांगी सोडून झाकण ठेवून मंद गस वर ५-७ मिनिटे ठेवले. (किंवा मायक्रोवेव्हमध्ये २ मिनिटे ठेवले तरी चालेल.)


झाली तयार झणझणीत बैगन मसाला करी !

वाचने 24836
प्रतिक्रिया 46

प्रतिक्रिया

नाना चेंगट गुरुवार, 16/08/2012 14:20

नाना चेंगट यांचे निधन
भोकरवाडी (वार्ताहर) : भोकरवाडीतील एक उमदे व्यक्तिमत्व असलेले नाना चेंगट यांचे नुकतेच अल्प आजाराने निधन झाले. याविषयी अधिक माहिती अशी की त्यांनी मरण्यापुर्वी स्नेहांकिता यांनी केलेल्या बैंगन मसाला करी या पाककृतीचे फोटो मन लावून पाहिले. त्या फोटोंकडे टक लावून पहातापहाताच त्यांची समाधी लागली आणि समाधी अवस्थेतच त्यांचे प्राणोत्क्रमण झाले. या घटनेमुळे सर्वत्र हळहळ व्यक्त केली जात असून त्यांना सद्गती लाभो म्हणून सर्वधर्मीय प्रार्थनांचे आयोजन करण्यात आले आहे. त्यांच्यावर उद्याच्या अंकात खास पुरवणी काढून लेख लिहिण्यात येईल. आपल्या प्रतिक्रिया आपण आम्हाला कळवु शकता. योग्य प्रतिक्रियांना आमच्या अंकात छापले जाईल.

अर्धवटराव गुरुवार, 16/08/2012 21:52

उर्वरीत "पापी" मिपाकर लवकरच येथे येतील याची खात्री आहे.

अर्धवटराव

सुहास झेले गुरुवार, 16/08/2012 15:17

ज ह ब ह री...... !!!

अवांतर - नान चेंगाट ह्यांना वांग्याजली ;)

Mrunalini गुरुवार, 16/08/2012 15:49

वा.... एकदम सही..... :) आता मस्त तांदुळाची भाकरी पाहिजे ह्या सोबत.. काय जबरी लागेल. मस्त एकदम.
नाना चेंगट ह्यांच्या आत्म्यास शांती लाभो. ;)

मी_आहे_ना गुरुवार, 16/08/2012 16:46

कातिल पा.कृ. ही पा.कृ. पाहून सर्वांच्याच अत्रुप्त झालेल्या आत्म्यांना असेच झणझणीत काही खायला मिळो!!!
(चलो कॅफेटेरिया.. झणझणीत काहीतरी शोधणे आले)

पैसा गुरुवार, 16/08/2012 17:26

काय जबरदस्त पाकृ आहे! कोणीतरी आयती तयार करून आम्हास्नी आवतण धाडील काय?

निवेदिता-ताई गुरुवार, 16/08/2012 19:12

माझ्याकडे......मी बनविते असे झणझणीत की नाकातोंडातून पाणीच आले पाहिजे....
(अवांतर -- एवढे झणझणीत कसे काय खावू शकतात लोक)
नाना चेंगटांना आवडले असते...पण्ण्ण्ण्ण

पुष्करिणी गुरुवार, 16/08/2012 18:23

वा वा मस्तच.....नक्की करणार
मगजबी म्हण्जे काय ?

रेवतीताई : ते आइस्क्रीम चे गोळे म्हण्जे एकत्र वाटलेलं खोबरं + नारळ् + लसूण + तीळ + आलं + मगजबी आहे

रेवती गुरुवार, 16/08/2012 18:49

ओक्के! धन्यवादस्.
मगज म्हणजे टरबूज, लाल भोपळ्याच्या बिया, पदार्थाला दाटपणा आणि चव येण्यासाठी वापरतात. पंजाबी ग्रेव्ह्यांमध्ये उपयोग जास्तप्रमाणात होतो असे ऐकून आहे.

सस्नेह गुरुवार, 16/08/2012 19:54

अगदी बरोबर !
मी या मसाल्याचे मिश्रण अंड्यांच्या ट्रेमध्ये भरून फ्रीझर्मधे ठेवते. काही वेळाने त्याचे असे बॉल्स तयर होतात. ते डब्यात भरून परत फ्रीझरमधे ठेवते. म्हणजे आयत्या वेळी अंडा करी, मटकीचा रस्सा, पडवळाची किंवा दोडक्याची मसालेदार भाजी इ. मधे वापरता येतात.
धन्यवाद रेवतीताई.

अर्धवटराव गुरुवार, 16/08/2012 21:56

खल्लास... किती खाऊ किती नाहि असं होतय... फक्त बनवणं बाकी आहे :(

अर्धवटराव

स्पंदना शुक्रवार, 17/08/2012 06:24

आधी ती हिरवी वांगी पाहुन जीव गेला. उरला सुरला ती वांगी करी बघुन निर्वतला. मला वांग्यात भरपुर तूप घालुन खायला फाऽऽर आवडत. ( आम्हाला तुपाला साजुक हे विशेषण लावायला नाही लागत ते साजुकच असत)*

तर अस जरा गेलेला जीव निवांत जाउ द्यावा म्हंटल तर नाना .....
जाउ दे आता त्याच्या श्रद्धांजली पुढे आम्हा गरीबांना कोण पुसणार?

आनन्दिता मंगळवार, 18/12/2012 23:45

वांग्यात भरपुर तूप आ हा हा हा ... कसल्या कसल्या आठवणी काढतेयस गं अपर्‍णा तै.. आधीच यांच्या पाक्रु ने जीव जायची वेळ आलीये न वरुन तू अत्याचार सुरु कर!!!

मधुरा ashay शुक्रवार, 17/08/2012 10:34

अप्रतिम...

खरच कोल्हापुरि रन्ग आला आहे..तोन्डाला मस्त पाणि सुट्ल..

इरसाल शुक्रवार, 17/08/2012 15:11

म्हणे ह्या भाजीबरोबर बाजरीची भाकरी हवी.कुठुन धागा दाखवला असे झाले.
झाल्या प्रकाराचा तत्काल निशेध.

अवांतर : बाकीच्यांनी २६ ला पुण्याला १०व्याच्या कट्ट्याला जमावे.

चिंतामणी रविवार, 19/08/2012 23:29

तुमच्या भाषेत याचा अर्थ "भाकरी बडव आणि खायला घाल" असा होतो?????????? :o:

इरसाल सोमवार, 20/08/2012 15:14

तुम्ही काय चांगले दिवस येवु देनार नाय काका.
का भाकरी बडवायच्या कामाला लावता ????:(
कायमचा त्रास होईल मला

सस्नेह शुक्रवार, 17/08/2012 19:23

सर्व प्रतिसादकांना मनःपूर्वक धन्यवाद !
विशेषतः सानिकाजी, गणपा, mrunalini, निवेदिता ताई इ. पाकृ मधील दर्दींनी माझ्या अडाण्या पाकृबद्दल चार चांगले शब्द लिहिलेले वाचून ड्वाले पाणावले !
पाकृ बनवणे हा माझा हातखंडा नसून दुसर्‍यांच्या पाकृ खाणे व वाखाणणे हा माझा अड्डा आहे हे माझे वैयक्तिक मत आहे. पण काही हातच्या बोटावर मोजता येणार्‍या पाकृ मला बर्‍या जमतात. त्यातलीच ही एक.
आणि हो, त्या नानबा चेंगटाच्या आत्म्याला म्हणावे की येत्या रविवारी या पाकृबरोबर बाजरीची भाकरी बनवणार आहे. मुकाट्याने देहात शिर अन ये जेवायला !

चिंतामणी रविवार, 19/08/2012 23:25

>>> काही हातच्या बोटावर मोजता येणार्‍या पाकृ मला बर्‍या जमतात. त्यातलीच ही एक.

किती ही विनयशीलता.

जमण्याबद्दल म्हणाल तर आवडीने केले असेल तर काहिही करायला जमते. हे जमते कारण आवडते म्हणून.

तेंव्हा आवडीने इतर पदार्थसुद्धा बनवा, आणि खायला बोलवा.

वेताळ शुक्रवार, 17/08/2012 19:43

पण श्रावण संपताना अशी पाकृ टाकल्या बद्दल निषेध. अहो आता रविवारी वांगी कशाला खातोय.......मटन आणि बिर्याणी.........

सस्नेह शुक्रवार, 17/08/2012 20:00

अरे वेताळा ! तुला रे कसला श्रावण अन कुठला अधिक महिना !
तुला बारा महिने अंडी अन कोंबडीच हवी ना रे !

प्यारे१ शनिवार, 18/08/2012 19:37

राम नाम सत्य है...!
आमच्यासाठी वांगं हीच तंगडी.
बाकी एवढं तेल पाहून आलेल्या करपट ढेकरामुळे आमच्यापेक्षा वयस्कर लोकांनी दिलेली प्यारे'काका' ही पदवी सार्थ वाटू लागली आहे.

चिंतामणी रविवार, 19/08/2012 23:20

म्हणजे खास आवडीची गोष्ट. त्यातून या पाकृने तर पार खल्लास केले.

शेवटचे दोन फटु म्हणजे तर कातीलच. ज्वारी/बाजरीच्या भाकरी बरोबर खाणे म्हणजे एकदम चैन.

केदार-मिसळपाव बुधवार, 19/12/2012 23:21

वरिल सर्व प्रतिक्रियान्शी सहमत्...मनातल्या भावना पोहोचल्या...शेवटचा फोटो एकदम फक्कड आलाय...