नोव्हेंबर २०२६ । कार्तिक १९४८ । घडामोडींची चर्चा

नोव्हेंबर २०२६ । कार्तिक १९४८ । घडामोडींची चर्चा 

नमस्कार मित्र-मैत्रिणींनो 🙏

या महिन्यातील घडामोडींवर चर्चा करण्यासाठी हा धागा काढत आहे.

हिंदूंचा लोकप्रिय उत्सव सण दिवाळीचा याच महिन्यात येत आहे. दिवाळीआधीच दिवाळीच्या हार्दिक शुभेच्छा! ही दिवाळी आपणांस सुख, समृद्धी व भरभराटीची जावो ही श्रीचरणी प्रार्थना! ज्यांच्या घरात दिवाळी साजरी होते शक्यतो त्यांच्याकडूनच दिवाळीची खरेदी करावी ही अपेक्षा.  

आज काँग्रेस प्रणित आघाडीतर्फे, व भाजपतर्फे दिल्लीत वेगवेगळ्या ठिकाणी, वेगवेगळ्या कारणांनी मोर्चे आयोजित करण्यात आले होते. त्यांचा केंद्रीय राजकारणावर काय प्रभाव पडतो हे पाहणे रोचक ठरेल. पुढच्या वर्षी पहिला तिमाहीत उत्तर प्रदेश व पंजाबसहित पाच राज्यांच्या विधानसभा निवडणुका होणार आहेत. उत्तर प्रदेशात सलग तिसऱ्यांदा सत्ता मिळवण्याच्या दृष्टीने भाजपची रणनीती आणि योगी आदित्यनाथ यांची राजकीय वाटचाल कशी राहते, याची पूर्वचिन्हे या महिन्यात दिसतील का?'

यावर्षीचा पावसाळा बराचसा निराशाजनक ठरला आहे. अनेक ठिकाणी दुष्काळजन्य परिस्थिती आहे. नुकत्याच आलेल्या अर्णव वादळाने मध्य पूर्व भारतात एक-दोन दिवस जोरदार पाऊस पडला असला तरी त्याचा प्रभाव sustainable नाही. परतीचा मान्सून कदाचित चार सरी पाडून जाईल पण एकूणच यावर्षी पाण्याचे दुर्भिक्ष प्रत्यक्ष-अप्रत्यक्ष रीतीने जाणवेल हे नक्की. बंगालच्या उपसागरातील पुढच्या वादळाचे नाव उपाना ठरविण्यात आले आहे व हे नाव भारताने दिले आहे. हे वादळ लगेच, पुढच्या एक-दोन आठवड्यात येऊ शकेल का?    

२०२६ दिवाळीआधी सोने दोन लाखांवर जाईल असा वर्षभरापुर्वी माझा अंदाज होता. या वर्षाच्या सुरुवातीला सोने पावणेदोन लाखांच्या पुढे जाऊनही आले. पण नंतर उद्भवलेल्या पश्चिम आशियातील युद्धपरिस्थितीमुळे मात्र सोने अजूनही दीड लाखाच्या आसपासच घुटमळत आहे. सोन्याला पुन्हा सोन्याचे दिवस यायला अजून किती दिवस लागतील?  

यावर्षी लक्ष्मीपूजन ८ नोव्हेंबर २०२६ रोजी आहे. साधारणतः सायंकाळी आठ वाजताचा मुहूर्त आहे. लक्ष्मी ही धन-धान्य-संपत्ती-पैसा यांची देवता. दहा वर्षांपूर्वी याच दिवशी सायंकाळी आठ वाजता रोख पैशांसंबंधी देशाच्या इतिहासातील एक मोठी घटना घडली होती. तिचे बरेवाईट परिणाम काय झाले याचा आढावा, आता दशकभरानंतर घेता येईल का?

याच दिवशी शेअर बाजार व्यापाऱ्यांसाठी, लक्ष्मीपूजनाव्यतिरिक्त दिवाळी मुहूर्त ट्रेडिंग हा तासाभराचा एक विशेष भाग असतो. या दिवशी खरेदी-विक्री करणे शुभकारक असते अशी श्रद्धा आहे. मीही नियमितपणे मुहूर्त ट्रेडिंग करतो. यावर्षी दुपारी अडीच ते साडेतीन असा मुहूर्त NSE कडून घोषित झाला आहे. त्यादिवशी काय घ्यायचे, काय विकायचे याचे नियोजन या आठवड्यात करता येईल. शेअर बाजारात प्रवेश करू इच्छिणारे कुणी मिपाकर्स व्यापारी या दिवशी ट्रेडिंग सुरु करतील का?

- कांदा लिंबू