कोणी नोकरी देता का नोकरी ???

राम राम मंडळी, कसे आहात ? काय चालु आहे ? ("रोजच्या गप्पाटप्पा करण्यासाठी,वाढदिवस, बातम्या आणि इतर अश्याच तात्कालीक चर्चांसाठी हा खरडायचा फळा आहे" हे आठवल्याने बाकीच्या गप्पा खरडफळ्यावर. असो.") तर आम्ही आज तुमच्यापुढे एक जटिल समस्या घेऊन आलो आहोत. त्याचे आहे की परवा तो विनायक पाचलगच्या धाग्यातली "दमलेल्या बापाची कहाणी" ऐकुन आम्ही ( बाप न होताच ) हळवे झालो व एका बेसावध क्षणी तशी प्रतिक्रिया देऊन बसलो. त्याचा मग शॉट असा झाला की असे "हळवे होणे" हे सरळसरळ "पैशासाठी धावाधाव" करणार्‍यांच्या हलक्या, स्वार्थी, निष्ठुर आणि दगडाचे काळीज असणार्‍या हलकट मनोवॄत्तीचे लक्षण आहे असा एक भयंकर शोध आम्हाला लागला. शिवाय अशा लोकांतच कुठेही आणि कशावरही हळवे होण्याची लक्षणे दिसु लागतात अशा आशयाचा एक शोधनिबंधही वाचनात आता, हे तर मग स्वाईन-फ्ल्यु पेक्षाही भयानक हो. तिकडे निदान मास्क घालुन तोंड तरी लपवता येते, इकडे ती ही सोय नाही. आता तसे तुम्हाला सांगायला हरकत नाही की आम्ही सध्या एका बहुराष्ट्रीय कंपनीत ( शिव्या घालायला सोपे जावे म्हणुन फार फार तर तुम्ही अमेरिकन कंपनीत म्हणु शकता ) एका बर्‍यापैकी हुद्द्यावर संगणकावर काम करुन करावी लागणारी नोकरी करतो, आयटी वगैरे नाही बरं का (पण शिव्या देण्याच्या सोईसाठी तुम्ही आम्हाला "आयटी वाले" म्हणु शकता) ! मग काल आम्ही तडकाफडकी आम्ही आमची "मनोवॄत्ती" लगेचच "राष्ट्रप्रेम, निष्ठा, संस्कृती, संस्कार, भावनात्मकता, हळवेपणा" असे अनेक फिचर्स असलेल्या एका देशी अ‍ॅन्टीव्हायरसला स्कॅन करण्यासाठी दिली. फटफट रिपोर्टही आला, सरकारी काम आणि ६ महिने थांब असले लाड परवडत नाहीत हो आम्हाला ( असो, त्यावरचा कौल समसद्वारे घेऊ आम्ही नंतर कधीतरी ). अहो आश्चर्यम् ! त्या स्कॅनिंग सॉफ्टवेअरने आमची मनोवृत्ती "कचर्‍यात फेकुन देण्याच्या लायकीची" असल्याचा निर्वाळा दिला व बरोबर एरर कोड्सची जंत्री दिली ... आम्हाला अत्यंत दु:ख झाले !!! आज सकाळी उठल्यावर आम्ही ह्या विषयाचा सोक्षमोक्ष लावायचेच ठरवले हा काथ्याकुट खरडायचा निर्णय घेतला ... तर मंडळी, असे आहे सर्व ... हवी आहे एक मस्तपैकी नोकरी !!! आमची अर्हता : लिहण्यावाचण्यापुरते व्यवस्थित शिकलो आहोत. संगणकावरही खरडता येते. काम सोडुन मराठी संकेतस्थळांवर तासनतास टीपी करण्याचे वादादीत कौशल्य. शुद्धलेखनाचा व हिब्रु भाषेचा मनापासुन तिरस्कार करतो कारण यातले आम्हाला घंटा कळत नाही, "स्वाहिली" भाषेवर पीयच्च्डी कारण्याचा विचार आहे, पुर्वतयारी म्हणुन एक प्रतिसादही प्रकाशित केलेला आहे ( व तो देवदयेने अजुन उडाला नसण्याचे चान्सेस आहेत ). संधी दिल्यास "सरकारचे डोके ठिकाणावर आहे / देवाला निवॄत्त करा " असे जळजळीत अग्रलेख लिहण्याची पात्रता. आम्ही कट्टर "धर्मनिरपेक्ष" आणि "सेक्युलर" आहोत. "चित्रपट परिक्षणे" लिहु शकतो. आमच्या अपेक्षा : आमच्या ग्रीन बुकमधुन सर्वात प्रथम "हलक्या, स्वार्थी, निष्ठुर आणि दगडाचे काळीज असणार्‍या हलकट पैशाला हापापलेल्या मनोवॄत्तीचे नामोनिषाण" मिटवुन टाकावे. सर्वात महत्वाचे, पैशासाठी धावाधाव करायला अजिबात नको. जो काही पैसा मिळतो तो आम्ही राष्ट्र-उभारणीच्या महान कार्यात उचलेल्या वाट्याबद्दल फुल ना फुलाची पाकळी म्हणुन योग्य ते ( म्हणजे जे मला योग्य वाटते ते, तुमच्या मताला काही किंमत नाही ) मानधन ( ता.क. : भारतीय रुपायातच, तो डॉलर्सचा माज तुमच्याकडेच राहुद्यात ) म्हणुन द्यावे. नोकरी शक्यतो माझ्या गावीच असावी म्हणजे मला पुढचे डावपेच ठरवणे सोपे जाईल. "ऑनसाईट" वगैरे ऑफर्स अरबी समुद्रात बुडवण्यात येतील. नव्या व्यवस्थापनाकडुन राहण्यास घर, गाडी, फोन वगैरे सुविधा मिळणार असल्यास त्याचा अनादर केला जाणार नाही ( मात्र न मिळाल्यास आम्ही निषेध करण्यास मोकळे आहोत). आमच्या कमिटमेंट्स : ( अहो ***चे रक्त आहे, काय समजलात ? एक वेळ शीर कापुन देऊ पण इमानाला बोल लाऊन घेणार नाही. ) आमच्या कडव्या "स्वामीनिष्ठे"बाबत काळजी नसावीच. जॉब बदलण्याचा व "पैशामागे धावाधाव" करुन स्विच मारण्याचा विचारही करणार नाही. मात्र तुमचे जे काही नियम असतील त्याप्रमाणे पगारवाढ मिळावी नाहीतर आम्ही ... हॅ हॅ हॅ ... असो, तुर्तास एवढेच. बाकी सुचेल तशी अटींमध्ये भर घालत राहिन ... मायबाप मिपाकरांनो, कुणी तरी मला नोकरी सुचवा हो नवी नोकरी ...!!! जीव शिणला आहे हो "पैशामागे धावाधाव" करुन टीप : निखळ मनोरंजन आणि टाईमपास म्हणुन हा धागा आहे ह्याची अवश्य नोंद घ्यावी, अवांतर चर्चेस आमची ना नाही पण वैयक्तिक हल्ले टाळावेत ही विनंती. प्रतिसाद देताना आपल्या "मोनॅको पॉवर्ड" प्रतिसादांची काळजी आपण स्वतःच घेतल्यास उत्तम ...!!! बाकी सर्वांनी ह.घ्या. हे वेगळे सांगायला नको.