एक विनंती

मित्रांनो , आपल्या या आवडत्या संकेतस्थळावर होणार्‍या हल्ल्याबद्दल, त्यावरील उपाययोजनांबद्दल , सर्व्हरच्या वेगाबद्दल , तो वाढवण्याबद्दल , वर्गणीबद्दल आपण सर्व इथे आपापले विचार मांडतच असतो. हा धागाही या संकेतस्थळाबद्दलचाच आहे. अलिकडच्या काळात एक संपादक म्हणून आणि एक मित्र म्हणून मला काही व्य नी आले की , अवांतर प्रतिसाद , थट्टा मस्करी वगैरेचे प्रमाण खूप वाढले आहे आणि मुख्य म्हणजे, जिथे एखाद्याने एखादे मनोगत/चर्चाप्रस्ताव मांडला आहे तिथेही हेच घडल्याचे प्रकारही घडले आहेत. या संदर्भात संपादक मंडळाची काही जबाबदारी आहे की नाही ? या अर्थाचा प्रश्न प्रश्नकर्त्याने केला आहे. मिपाच्या कलमांचा कुणी सरळसरळ भंग केला , प्रक्षोभक लिखाण , शिवीगाळ , वैयक्तिक शेरेबाजी, वगैरे केली तर ते निपटून टाकणे हे संपादक मंडळाचे काम आहे आणि मंडळातील प्रत्येकजण जमेल तितपत ते करतोच. मात्र , या संकेतस्थळावर सौहार्दाचे , एकंदर समंजसपणाचे वातावरण रहाणे , विनोद-मस्करी आणि विचारांची देवाणघेवाण या सार्‍याचा समतोल राखणे ही जबाबदारी अंतिमतः सगळ्या सभासदांचीच आहे. कुठल्या गोष्टी खरडवहीत लिहायच्या, कुठल्या ख फ वर लिहायच्या , आणि कुठल्या धाग्याचे उद्दिष्ट काय याचे भान राखणे आवश्यक आहे. असे न केल्याने कुठल्या नियमाचा भंग तर होत नाही , पण आपल्याच संकेतस्थळाचे आपण (नकळत) नुकसान करतो. इथे विनोद, थट्टा , मस्करी करूच नये असे मी बिलकुल म्हणत नाही आहे. पण या नादात आपण आपल्याच स्थळाच्या नावाला , प्रसिद्धीला बाध तर आणत नाही ना ? याचे भान राखणे आवश्यक आहे. कुणाही एका व्यक्तीला उद्देशूने हे आवाहन केलेले नाही, थोडेसे "लाऊड थिंकिन्ग" केल्यासारखे लिहिले आहे याची नोंद घ्यावी.