कलंत्रीसाहेब, कृपया खालील प्रश्नांची उत्तरे द्या, ही विनंती.. घटना - मी अन् माझी बहिण रस्त्याने चाललो आहोत. कुणा गुंड-मवाल्याने माझ्या बहिणीकडे पाहात अत्यंत अश्लील उद्गार काढून तिचा अपमान केला, तिच्या स्त्रीत्वाला शिवी दिली. त्यावर मी त्या गुंडाला भररस्त्याततच लाथा-बुक्क्याने बडवला, आणि बेदम झोडून काढला. प्रश्न - १) त्या गुंडाला तिथल्या तिथे लाथा बुक्क्याने बडवणे ही मी केलेली कृती आपल्याला योग्य वाटते का? २) आणि माझ्या या कृतीमुळे त्या गुंडाचे अश्लील उद्गार ऐकून भररस्त्यात माझ्या बहिणीची चारचौघात खाली गेलेली मान क्षणार्धात अभिमानाने उंचावेल आणि पर्यायाने तिचा आत्मसन्मान जपला जाईल असे आपल्याला वाटते का? ३) की मी काही वेगळी कृती करायला हवी होती? असेल तर ती कोणती, की ज्यामुळे माझ्या बहिणीला तिथल्या तिथे न्याय मिळेल आणि ती मान उंचावून रस्त्याने चालू शकेल? बोला कलंत्रीशेठ! आपल्या उत्तरांची वाट पाहतो आहे. कृपया काही अवांतर लेखन न करता मी विचारलेल्या प्रश्नांची थोडक्यात परंतु नेमकी उत्तरे द्या ही कळकळीची विनंती.. काहीतरी अवांतर किंवा दिशाभूल करणारे लेखन कराल तर ते माझ्या डोक्यावरून जाईल एवढेच नम्रपणे सांगू इच्छितो. मी होता-होईल तोवर अत्यंत साध्या व सरळ शब्दात प्रश्न विचारले आहेत, तेव्हा त्याची उत्तरेही तेवढीच साधी व सरळ असावीत अशी अपेक्षा करतो.. वास्तविक हे प्रश्न मी आपल्याला खाजगीतही विचारू शकलो असतो परंतु ज्या गांधीवादाचे आपण हट्टाने आणि सातत्याने समर्थन करत आहात तो गांधीवाद किती फोल आहे अथवा सशक्त आहे, किंवा मूळ मुद्द्याला बगल देत शब्दांवर शब्द रचलेला शब्दांचा नुसतच एक गडबडगुंडा आहे, हे आपल्या उत्तरावरून चाणाक्ष मिपाकरांच्या लक्षात यायला मदत होईल..! आपला नम्र, तात्या.