माझ्या घरातले मागच्या जन्मी मी फार मोठे पुण्य केल्याचा निर्वाळा देतात. " नशिबवान आहेस हो, एवढी सुगरण बायको मिळाली " वगैरे वगैरे. तुम्ही किती वाजता जाणार आहात हॉस्पिटल मधे. कलिंगड घालुन भिजवलेल्या तांदळाची घावने केली आहेत. लगेच पोचवा काकुना. गरम गरम खातील -बायको. देवा शपथ सांगतो मला जेंव्हा जेंव्हा बायकोशी भांडावेसे वाटते तेंव्हा ह्या पाकृ ची आठवण काढतो. सगळे भांडण पोटातच विरते. आणि ही घावने खाताना नेहेमीची चटणी सोडून 'चिकन' 'सुंगटे' किंवा 'पापलेट चे कालवण मिळाले तर मग काय बोलुच नका. ''गुलाम" व्हायची तयारी. साहित्य- सुमारे १४ घावनांसाठी (४ जणाना पुरतात) अर्धा किलो -कोलम तांदुळ एक लिटर पाण्यात रात्री भिजवावा. कलिंगड खाउन झाल्यावर सालीवर जो पांढरा भाग असतो त्याचे छोटे तुकडे, किसलेले खोबरे. पीठ वाटताना वेगळे पाणी घेउ नये. भीजवलेल्या पाण्याचा उपयोग करावा. मिक्सर मधे पीठ वाटताना भिजलेल्या तांदळाबरोबर कलींगडाचे तुकडे आणि थोडे किसलेले खोबरे टाकावे. पीठ हाताला तांदुळ लागणार नाही एवढे वाटावे. प्रमाण १०% किसलेले खोबरे, १०% कलिंगडाचे तुकडे ८०% भिजलेला तांदुळ. हे झाले पीठ तयार. खरी कलाकृती तर नंतर. घावने न करपता, न तुकडे होता अक्खी निखळावीत म्हणुन घ्यायची काळजी. तवा अगदी स्वच्छ असावा. तवा पुर्ण गरम झाल्याशिवाय पीठ घालु नये. तव्यावर नारळाच्या चोथीने तेल नीट पसरावे. घावन परतताना दुसर्‍या बाजुने नविन लोणी लावल्यास उत्तम सुगंध. चटणी : जरा आले, मीर्चीचा सढळ हस्ताने प्रयोग केल्यास घावनांची चव वाढाते.