पटकन होणारा माशांचा प्रकार तिलापिया, कॅटफिश या सारख्या माशांचे फिले ३-४ एक जुडी कोथिंबीर सहा-सात पाकळ्या लसूण (अमेरिकेत मिळणार्‍या जाडजूड पाकळ्या, चांगल्या ना़जूक पाकळ्या मिळण्याचं भाग्य असेल तर १५-२० ) दोन-तीन तिखट हिरव्या मिरच्या. एक चहाचा चमचा जिरं हळद, तिखट, मीठ लिंबाचा रस ( भारता बाहेर असाल तर लाइम जूस घ्यावा, शक्यतो लेमन जूस नको ) तेल. फिले धुऊन, पुसून कोरडे करावेत. त्यांचे साधारण दीड इंचाचे तुकडे करावेत ( बाईट साइझ ). तुकड्यांना हळद, मीठ, किंचित तिखट ( किंवा मालवणी मसाला/बीअर बाटली मसाला यापैकी एक ) लावून बाहेर अर्धा तास किंवा फ्रीज मधे २४ तास पर्यंत ठेवावे. कोथिंबीर, लसूण, मिरच्या अन जिरं एकत्र वाटावं. पाणी अगदी कमी घालावं वाटताना. पसरट पातेल्यात सढळ हाताने तेल घालावे ( सगळे तुकडे एकाच थरात मावतील एवढे पातेले असावे ). तेल चांगले तापले की हळू हाताने माशांचे तुकडे त्यात घालावेत. एका बाजूने जरा लालसर झाले की परतावेत. परतून दोन-तीन मिनिटांनी हिरवे वाटण, चवीपुरते मीठ घालावे. माशांचे तुकडे तुटू न देता सगळं वाटण नीट हलवावं. गॅस थोडा मंद करावा. वाटण शिजलं की गॅस बंद करावा व लिंबाचा रस पिळावा. पार्टीसाठी करायचं असल्यास मासे आधी परतून ठेवता येतील व वाटण सुद्धा आधी करून ठेवता येईल. वाढायच्या आधी तासभर दोन्ही फ्रीजमधून काढून बाहेरच्या तापमानाला येऊ द्यावे.