परदेशात असताना नेहमीच चकलीची भाजणी मिळणे शक्य नसते, परवाच ही कृती एका मैत्रिणीकडुन मिळाली आणि चकल्या चांगल्या, झटपट व कुरकुरीत झाल्या. साहित्य - २ कप तांदळाचे पीठ, १ कप बेसन, १/२ कप बटर, १ छोटा चमचा तिखट, थोडासा ओवा, तिळ, हळद चवीनुसार मीठ कृती - दोन्ही पीठे एकत्र मिसळून घ्यावीत. बटर थोडेसे वितळून घ्यावे व पिठात घालावे, बाकीचेही सर्व साहीत्य या पिठात घालणे. एका भांड्यात गरम पाणी करुन ते बेताबेताने वरील पिठात घालुन, पिठ चांगले मळुन घेणे. तेल कढईत चांगले गरम करावे. सो-याला आतुन तेल लावुन एका प्लास्टीकच्या कागदावर ४-५ चकल्या पाडुन घ्याव्यात व लगेच एकीकडे तळायलाही घ्याव्यात. साधारण मध्यम आचेवर चकल्या तळून घेणे. एक घाणा तळुन होइस्तोवर नविन चकल्या करुन ठेवाव्यात. टीपा: विस्तवाची आच खुपच प्रखर असेल तर चकल्या बाहेरुन गडद दिसतात, पण आतुन कच्च्या रहातात. व आच कमी असेल तर चकल्या नीट तळल्या जात नाहीत. वरील साहीत्याच्या साधारण ३०-३५ चकल्या होतात. आवडत असल्यास वरील पिठात लसुण वाटुन घातला तरी चांगला लागतो. एका ताटलीत चकल्या व दही घेऊन जालावरील नविन साहीत्याचा आस्वाद घ्यावा!!