आंब्याचे सासम/सासव

सध्या मिपावर आंबा पाकृचा पाऊस पडतोच आहे तर आपण पण थोडे भिजवुया या प्रांजळ विचाराने प्रेरित होउन ही पाकृ देते आहे. ही पारंपारिक सारस्वत पा़कृ आहे. ह्या पाकृसाठी खास रायवळ आंबे उत्तम. कोकणात, गोव्यात ह्या जातीचे आकाराने मोठे आंबे पहावयास मिळतात. मुंबईत मात्र लहान लहान असतात. पण चवीला गोड असले की झाले. साहित्य - ६ रायवळ आंबे १ वाटी ओले खोबरे १/२ वाटी किसलेला गूळ १/२ चमचा लाल मिरची पावडर १/४ चमचा मोहरी १/२ चमचा साजूक तूप चिमूट्भर मीठ. कृती - १. आंब्यांचा रस काढून घ्यायचा. बाटे/कोयी तशाच ठेवा. फेकू नका. २. साजूक तूपात मोहरी मस्त खमंग भाजून घ्यायची. तडतडण्याची गरज नाही. (मोहरीला हो!) ३. मिक्सर मध्ये खोबरे, भाजलेली मोहरी, तिखट, मीठ आणि आंब्याचा रस एकत्र करुन बारिक वाटून घ्यायचं. पाणी शक्यतो घालू नका. ४. आता गूळ घालुन पुन्हा जरासं वाटायचं. ५. मग हे मिश्रण त्या पिळून उरलेल्या, जीव नसलेल्या बाट्यांवर ओतायचं. थोडंसं प्यायचं पाणी मिक्सर मध्ये घालून मिक्सरला चिकटलेलं काढून घ्या. (बिन्धास्त! आपलच घर असतं. घाबरायची/लाजायची गरज नाही.) ६. आता हाताने सर्व एक्जीव करायचं. हाताने केलं की गूळाचा खडा राहीला नाही ना ह्याची खातर्जमा करता येते. (आणि शिवाय तो हात चाटुन घेतला की आपल्या वाट्याला थोडंसं जास्त येतं. असो!) झालं की सासम तयार! आता चपाती/पोळी बरोबर ताव मारायला तुम्ही मोकळे. करून बघा आणि आवडलं का ते मला नक्की कळवा बरं... सूचना - ही पारंपारिक कृती आहे. तेव्हा दिलेल्या कृतीत बदल/फेरफार करू नये. उदा. हळद घालणे, गरम करणे, फोडणी देणे इ. गेल्या कैक वर्षांत मीदेखील तशी हिम्मत केली नाही. तेव्हा तुम्हीही करु नये ही विनंती. :) - उल्का कडले.