Skip to main content

फ्रेंच फ्राईज...

लेखक प्राजु यांनी शुक्रवार, 19/09/2008 या दिवशी प्रकाशित केले.
मॅक डी, बर्गर किंग अशा ठिकाणी मिळणारे फ्रेंच फ्राईज हे लहानांपासून मोठ्यांपर्यंत सगळ्यांनाच आवडतात. मी घरी याचा प्रयोग करायला गेले तेव्हा जो काही मी तळलेला बटाटा केला त्याला फार तर फिंगर चिप्स म्हणता येईल. कारण तो कितीहि जास्ती तळून तो फ्रेच फ्राईज सारखा क्रिस्पी नाही झाला. आणि अचानक संजय टुम्माने (वाह रे वाह . कॉम)त्याचं रहस्य सांगितलं. त्या पद्धतीने मी करून पाहिलं आणि खरंच फ्रेंच फ्राईज फ्रोजण आणणं बंद केलं. घरीच सुंदर फ्रेंच फ्राईज बनतात. तर माझ्या फ्रेंच फ्राईज आवडणार्‍या मिपा मित्रमैत्रिणींसाठी ही पाककृती.. साहित्य : लांबट आकाराचे २ बटाटे (बटाटे घेताना त्याच्या बॅग वर बेकिंग युज असे लिहिलेले असले तर ते उत्तम) मीठ. कृती : १. बटाटे सालं काढून लांब उभ्या आकारात कापून घ्यावेत. शक्यतो आकार उभा चौकोनी द्यावा. २. मोठ्या पातेल्यात भरपूर पाणी घेऊन ते कापलेले बटाट्याचे तुकडे घालवेत. ३. पाणी उकळू लागले आणि बटाट्याचे तुकडे कडेने थोडे रंग बदलल्या सारखे दिसू लागतात. ४. बाटाट्याचे तुकडे अंदाजे ४०% शिजू द्यावेत. आणि मग पाण्यातून काढून पेपर टॉवेल वर टाकावेत. ५. १० मिनिटांनी ते पूर्ण कोरडे झाले की, तेल कडकडीत गरम करून त्यात तळून घ्यावेत. ते तळले गेले की, आपण नेहमी खातो तशा फ्रेंज फ्राईज सारखा रंग येतो. साधारण गुलाबी किंवा लाईट ब्राऊन ..म्हणू शकतो. ६. फ्राईज तेलातून बाहेर काढून पेपर टोवेल वर टाकावेत आणि लगेचच त्यावर मिठ भुरभुरावे आणि बाऊल किंवा जे काही भांड असेल त्यात वर उडवून म्हणजे टॉस करून ते मीठ सगळीकडे नीट लागेल याची काळजी घ्यावी. केचप सोबत खावे.. लेकासाठी मी हे फ्राइजचे प्रकार करून पाहिले..आणि एकदाचे जमले. :) - प्राजु
वाचने 11305
प्रतिक्रिया 32

प्रतिक्रिया

अनामिक शुक्रवार, 19/09/2008
मस्तं! याच पद्धतीने वेफर्सपण करता येतात. बटाट्याचे पातळ चिप्स पाण्यात अर्धवट उकडून घ्यायचे अन व्यवस्थीत कोरडे झाले कि तळायचे. एकदम सह्ही लागतात!!

मनस्वी शुक्रवार, 19/09/2008
करून बघीन आता. धन्यवाद प्राजु! मनस्वी *उलटा केलेला पिरॅमिड कधीच उभा राहू शकत नाही .* आलं लसूण मिक्सरवर/पाटा-वरवंट्यावर वाटून घ्यावे. (काहीच नसल्यास बारीक तुकडे करून पोळपाटावर ठेवून लाटण्याने च्चेप्पून घ्यावेत).

अरुण वडुलेकर शुक्रवार, 19/09/2008
उपाहार गृहात फ्रेन्च प्राईज खाल्ल्यापासून त्याची चांगली पाकृ मीही शोधत होतो. बाटाट्याच्या उभ्या कापलेल्या तुकड्यांना मक्याचे पीठ (कॉर्न फ्लोर) चोळून ते तळले तर बर्‍यापैकी कुरकुरीत होतात. पण फारसे समाधान होत नाही. सही पाकृ दिल्याबद्दल धन्यवाद.

प्रभाकर पेठकर शुक्रवार, 19/09/2008
बटाट्याचे तुकडे करून (फ्राईजच्या आकाराचे) अर्धवट उकडताना त्यात किंचित हळद टाकावी. तळल्यावर अजून छान दिसतात. बाकी कृती प्राजूने दिल्या प्रमाणे. आम्ही रोज पंधरा किलोच्या फ्रेंच फ्राईज बनवतो.

अभिज्ञ शुक्रवार, 19/09/2008
प्राजुताई, पाकृ आवडली. आपण हि पाकृ करून पाहणार. अभिज्ञ.

स्वाती दिनेश शुक्रवार, 19/09/2008
प्राजु,मी ही असेच बनवते फ्रेंच फ्राईज..(इथे त्याला पोमीज् फ्राईज म्हणतात.) आणि फ्रोझन फ्राईज पॅकेट आणले तर अवन मध्ये बेक करते तळत नाही. स्वाती

प्रियाली शुक्रवार, 19/09/2008
फ्रोझन फ्राईज पॅकेट आणले तर अवन मध्ये बेक करते तळत नाही.
फ्रोझन पाकिटातील पदार्थांवर बर्फाचा अंश राहिल्याने ते तेलात घातले असता तेल सर्वत्र उडून घाण होते. फ्रोझन पदार्थ सहसा बेक करावेत. फ्राईजसाठी बटाटा अर्धवट उकडून तळणे सर्वात उत्तम.

पद्मश्री चित्रे शुक्रवार, 19/09/2008
करून बघायला पाहिजे...

विसोबा खेचर शुक्रवार, 19/09/2008
सुंदर पाकृ! दारूसोबत खायला मजा येते! :) आपला, (व्हॅट ६९ प्रेमी) तात्या.

शितल शुक्रवार, 19/09/2008
प्राजु शब्बाश ग. मला ही ते खुप आवडतात. मी फ्रोजन पॉकीट आणले की ओव्हन मध्ये लावायचे. पण हे आता नक्की करून पहीन. अग तुला पिझ्झा ही माहित आहे का कसा करायचा असेल तर लगेच त्याची ही पाककृती देऊन टाक. :)

३_१४ विक्षिप्त अदिती शुक्रवार, 19/09/2008
>> अग तुला पिझ्झा ही माहित आहे का कसा करायचा असेल तर लगेच त्याची ही पाककृती देऊन टाक. त्यातही पिझ्झा बेस कसा करायचा ते!

प्रियाली शुक्रवार, 19/09/2008
मैद्यात, यीस्ट, मध, ऑलिव्ह ऑईल, मीठ आणि पाणी घालून चांगले मळून घ्यावे. सैल नको आणि घट्टही नको. तास दिड तास झाकून ठेवावे. मळलेले पीठ फुलून येते. ते पुन्हा चांगले मळून* अर्धातास झाकून ठेवावे आणि नंतर लाटावे. लाटलेल्या पोळीला काट्याने अधून मधून टोचून घ्यावे. त्यावर ब्रशने ऑलिव्ह ऑईल लावावे. नंतर त्यावर टॉमेटो सॉस, हवी ती टॉपिंग्ज, चीज वगैरे घालून ३७५ डी. वर १०-१५ मि. किंवा क्रस्ट बेक होईपर्यंत आणि चीज न जळेपर्यंत भाजून घ्यावे. झाला पिझ्झा तय्यार. * मळून घेताना या पिठाला केवळ पोळीच्या पिठासारखे हाताने मळून न घेता चांगले आपटा धोपटावे. चार-आठ रट्टे द्यावेत. एखाद्यावर राग काढायला संधी मिळाली नसेल तर त्या संध्याकाळी पिझ्झा करावा. पाककृती हमखास उत्तम होते. ;)

प्रियाली शुक्रवार, 19/09/2008
बहुधा थोडा गोडुसपणा यावा म्हणूनच असणार आणि साखरेमुळे जास्त गोडुस नको असे असेल. मी कुठेसं वाचलं होतं म्हणून मध घालते. खूप काही फरक लागतो असं नाही. वापरला नाही तरी चालेल. कधीतरी, खूप कष्ट नको असतील आणि वेगळा पिझ्झा हवा असेल तर परंपराचा एखादा बर्‍यापैकी लागणारा (सर्वच चांगले असतात असे नाही) चिकनचा मसाला आणून बोनलेस चिकन बनवते. ग्रेव्ही थोडी घट्ट ठेवते आणि पिझ्झ्यावर ही ग्रेव्ही आणि चीज टाकून बनवलेला पिझ्झाही वेगळा आणि चांगला लागतो.

प्राजु शुक्रवार, 19/09/2008
रात्री राहिलेला मटर पनिर सुद्धा घालून मी केला आहे पिझ्झा आणि सगळ्यात गम्मत म्हणजे माझ्या एका मैत्रिणीने आपण भोगीचि भाजी करतो ना.. ती जरा कोरडी करून पिझ्झा वर घातली म्हणे. चांगली लागली असावी.. - (सर्वव्यापी)प्राजु http://praaju.blogspot.com/

रेवती शुक्रवार, 19/09/2008
साठी पीठ मळताना मी दुधात भिजवते, किंचित साखर बाकी सर्व सेम. एकदा तर पाण्यात पिठ भिजवले व संपवायचे होते म्हणून नॉनफॅट ड्राय मिल्क मिसळले. फारसा फरक नाही पडला इतर वेळेपेक्षा. रेवती

प्रभाकर पेठकर शुक्रवार, 19/09/2008
यीस्टची वाढ साखरेच्या कोमट पाण्यात चांगली आणि भराभर होते. म्हणून ज्या-ज्या पदार्थात यीस्ट घालायचे त्याला १० मिनीटे साखरेच्या कोमट पाण्यात घालून ठेवतात. पण, हल्ली नवीन यीस्ट मिळते ते असे १० मिनीटे वेगळे ठेवावे लागत नाही. पिठात घालून पिठ डायरेक्ट भिजवायचे. अर्थात त्यातही साखर घालावीच लागते.

प्रियाली शुक्रवार, 19/09/2008
हल्ली नवीन यीस्ट मिळते ते असे १० मिनीटे वेगळे ठेवावे लागत नाही. पिठात घालून पिठ डायरेक्ट भिजवायचे.
बहुधा अमेरिकेत असेच डायरेक्ट घालण्याचे यीस्ट मिळते कारण त्याच्या वेष्टनावर किंवा पिझ्झ्याच्या पाककृतीत असे सांगितल्याचे वाचले नाही, म्हणजे इन्श्टंट असावे. यीस्टची वाढ साखरेच्या कोमट पाण्यात चांगली होते हे नव्याने कळले.

३_१४ विक्षिप्त अदिती शुक्रवार, 19/09/2008
>> यीस्टची वाढ साखरेच्या कोमट पाण्यात चांगली होते हे नव्याने कळले. त्याच कारणाने पावातही साखर असते. त्या बॅक्टेरियांना (बॅक्टेरियाच असतात ना), अन्न साखरेतूनच मिळतं.

प्राजु शुक्रवार, 19/09/2008
मीही अर्धा कप कोमट पाण्यात अर्धा चमचा साखर घालून यीस्ट घालते. ते कोमट पाण्यात चांगले वाढते.. फसफसते.. - (सर्वव्यापी)प्राजु http://praaju.blogspot.com/

चकली मंगळवार, 30/09/2008
छान दिसतोय पिझ्झा !. मी तु लिहलेस तसे ओवन बेक्ड फ़्राईज करते..मस्त होतात. फ़्रेंच फ़्राईज इतकी मजा नाही पण छान होतात! चकली http://chakali.blogspot.com

अद्वैत जोशी मंगळवार, 30/09/2008
हा पिझा माझ्या रसिक खादाडांपर्यंत चवीला तरी येऊ द्या. फक्त पाककृती वाचण्यात व फोटो पहाण्यात काय मजा ......... न खाता प्रतिक्रीया कशी देणार?? आणि हीच बाब इतर खाद्यपदार्थांसाठी सुद्धा लक्षात ठेवा, मी पुरणापासून हरणापर्यंत सर्व खातो. (एक रसिक खादाड) अद्वैत जोशी.

मिना भास्कर शनिवार, 08/11/2008
चीज आधीच न घालता १० ते १२ मिनीटांनी घालावे. टॉपिंग करीता ऑलिव्ह, मश्रुम, वापरले तर त्याला इटलियन चव येईल. भाज्या आवडत असतील तर, वांगी, सिमला मिरची, घोसावळे, यांचे काप थोड्याशा तेलावर हलकेसे शॉलो फ्राय करुन घ्या. ते टॉपिंग करता वापरा.

रेवती शुक्रवार, 19/09/2008
अश्याच पाककृती ज्याने वजन वाढण्याची ग्यारंटी. फ्रेंच फ्राईज आवडत नाहीत असा माणूस विरळा (खूपच अवांतरः मला अशी व्यक्ती माहीत आहे जीला हापूस आंबा आवडत नाही) . पाकृ आवडली. तू सांगितली होतीस एकदा मला. रेवती

मीनल सोमवार, 13/10/2008
फ्रेंच फ्राईज तयार झाल्यावर ते लगेच फस्त न करता त्याची भाजी ही करता येते. फोडणी करावी. त्यात लाल सुक्या मिरच्यांचे तुकडे घालावेत. मग त्यात सफेद तीळ ,काजूचे तुकडे घालून गार होऊ द्यावे. वरून हवे असेल तर मीठ,चिमूट भर साखर घालावी. थोडेसे लाल तीखट रंगासाठी घालावे . त्यात फ्रेंच फ्राईज हलकेच मिक्स करावेत म्हणजे ते मोडणार नाही . सर्व्ह करताना वरून कोथिंबीर घालावी. पार्टी स्टाईल मस्त कुरकुरीत भाजी होते. मीनल