चटपटीत आणि पौष्टीक अप्पे चाट

मिपाकरांना नमस्कार अनेक दिवसांनी मिपावर लिहिते आहे. लहान बाळाच्या मागे 'बिझी' असल्याने वाचायला, लिहायला विशेष वेळ मिळत नाही. पण हरकत नाही आता आले आहे. एक नवी कोरी संशोधित रेसिपी तुम्हाला खिलवायला. आपल्यापैकी अनेकांच्या घरी आप्पे हा प्रकार होत असेल. आप्पे हे मुख्यत्वे रव्याचे किंवा मिश्र डाळींचे बनवले जातात. काहीजण हे आप्पे गूळ घालून गोड बनवतात तर काहीजण तिखट. मी या आप्प्याचं रूप थोडं पालटायचा प्रयत्न केला; आणि बनवलं, आप्पे चाट. ~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

साहित्यः
आप्प्यांसाठी

• एक वाटी चणाडाळ
  
• अर्धी वाटी मूगडाळ
  
• पाव वाटी उडीद डाळ
  
• एक इंच आलं, दोन मिरच्या, व तीन ते चार लसणीच्या पाकळ्या
  
• दोन मध्यम आकाराचे बारीक चिरलेले कांदे
  
• चवीनुसार मीठ

चाटसाठी

• गोड चटणी (जी शेवपुरीला बनवतो तीच)
  
• पुदीन्याची चटणी (तिखट)
  
• शेव
  
• बारीक चिरलेली कोथिंबीर

कृती:
- सर्व डाळी एकत्र करून धुवून घ्याव्यात व त्यात साधारण दुप्पट पाणी घालून रात्रभर भिजत ठेवाव्यात
- दुसर्‍या दिवशी सकाळी त्या डाळी व आलं, लसूण, मिरच्या एकत्रित मिक्सरवर वाटून घ्यावे
- मिश्रण साधारण इडली पिठापेक्षा घट्ट ठेवावे
- त्यात चवीनुसार मीठ व चिरलेला बारीक कांदा घालावा
- शक्य असल्यास तासभर हे मिश्रण असेच ठेवावे ज्यामुळे आप्पे हलके होतात व छान फुगतात. सोड्याची गरज लागत नाही
- आप्पे पात्र गॅसवर ठेवून त्यात तेल सोडावे
- गरम झाल्यावर त्यात हे मिश्रण चमच्याने घालावे व वरून झाकण ठेवावे
- अंदाजाने काही वेळाने आप्पे उलटावेत. उलटलेली बाजू सोनेरी रंगाची दिसायला हवी.
- याचप्रमाणे दुसरी बाजू सोनेरी झाली की आप्पे काढून घ्यावेत.

आप्पे तर रेडी झाले. आता चाट करताना:

- एका बाऊलमधे दोन ते तीन आप्पे कुस्करावेत.
- त्यावर दोनही चटण्या मुबलकपणे घालाव्यात
- वरून शेव कोथिंबीर पेरावी व चाटमसाला भुरभुरवावा
- आवडत असल्यास डाळिंबाचे दाणेही घालता येतात

आप्पे चाट ताव मारण्यास तयार आहे !

बाकी या पदार्थाचा जो मी स्टॉल लावला होता एका प्रदर्शनात, त्याचा अनुभव फारच छान होता. लोकांचा प्रतिसाद एकदम भारावून टाकणारा मिळाला.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~