शेखरच्या मागणीवरून ही पाकृ लिहिते आहे. कुळीथ पीठ १/२ वाटी,३ ते ४ हिरव्या मिरच्या,६ते ७ लसूण पाकळ्या,एखादे आमसुल,ओले/सुके खोबरे,कोथिंबिर,तेल,फोडणीचे साहित्य कुळथाच्या पीठात ३ ते ४ वाट्या पाणी घालून कालवून घ्यावे,त्यात मीठ घालावे. तेलाची खमंग फोडणी करावी.त्यात लसूण पाकळ्या,मिरच्या,आमसूल घालावे.व हे कुळथाचे पीठ घालावे.खोबरे व कोथिंबिर घालावे.खळखळून उकळू द्यावे,चांगले शिजू द्यावे. हे पिठले पातळच करावे व गरम गरम पिठले वाफाळत्या भाताबरोबर खावे.सोबत पोह्याचा पापड नाहीतर मिरगुंडे आणि सांडगी मिरची असावी,बाहेर पाऊस कोसळत असावा... (काही जण फोडणीत पाणी घालून उकळतात व त्यात पीठ घालतात,पण गुठळ्या टाळण्यासाठी आधी पीठ पाण्यात कालवून मग फोडणीत घालणे चांगले.म्हणजे मी तरी तसे करते.)