मालपुआ - रबडी

साहित्य झटपट मालपुआसाठी: १ वाटी गव्हाचे पीठ १ वाटी दूध १/२ वाटी साखर ३/४ वाटी पाणी १ टेस्पून भरडसर वाटलेली बडीशेप पावडर चिमूटभर मीठ १ टीस्पून इनो फ्रुट सॉल्ट तळण्यासाठी तूप (हो हो तुपचं , तेलात तळले तर मजा नाही पाकृला ;) ) साहित्य सर्व्हिंग व सजावटीसाठी : तयार रबडी (रबडीची पाकृ नंतर कधीतरी देईन) बदाम-पिस्त्याचे काप केशराच्या काड्या चिमूटभर वेलची पावडर पाकृ: एका भांड्यात साखर व पाणी एकत्र करून उकळी काढा. साखरेचा एकतारी पाक करून घ्यावा. (साधारणपणे गुलाबजामाच्या पाकाप्रमाणे) पाक तयार झाला की वेगळ्या बाऊलमध्ये काढा. दुसर्‍या भांड्यात गव्हाचे पीठ, बडीशेप पावडर, मीठ एकत्र करुन घ्या. त्यात थोडे थोडे करून दुध घाला व मिश्रण चांगले मिक्स करा. एकही गुठळी होता कामा नये. मिश्रण साधारणपणे जिलबीच्या मिश्रणाइतपत घट्ट असावे. ( फार पातळ नको) फ्राईंग पॅनमध्ये तुप मंद आचेवर गरम करावे. मिश्रणात एनो फ्रुट सॉल्ट घालावे व हलकेच फेसावे. त्यात चमच्याने छोटे छोटे मालपुए घालावे. छान फुगतील व जाळीदार होतील. एका बाजूने सोनेरी रंगावर तळले गेले की उलटवून दुसरी बाजू तळावी. तळलेला मालपुआ झार्‍याने काढून, दाबून त्यातले तूप काढून टाकावे. लगेच कोमट पाकात घालून २-३ मिनिटे मुरु द्यावे. असे सर्व करून घ्यावे. निथळून सर्व्हिंग प्लेटमध्ये काढावे. त्यावर तयार रबडी घालावी. बदाम-पिस्त्याचे काप पेरावे. केशर व वेलचीपूड भरभुरावी व सर्व्ह करावे. नोटः ह्या मिश्रणाचे साधारण १०-१२ मालपुए होतात. आपण मालपुआ रबडीबरोबर सर्व्ह करत आहोत म्हणून साखरेचा पाक कमी गोड केला आहे (रबडी ही चवीला गोड असते म्हणून). जर तुम्हाला रबडीसोबत सर्व्ह करायचे नसेल तर तुम्ही साखरेचे प्रमाण वाढवू शकता. मालपुआ पाकात घालून मुरु द्यावा व सर्व्हिंग प्लेटमध्ये काढून त्यावर पिस्त्याचे काप व केशर घाला. पाकृ सौजन्य: ही पाककृती मी ईटीव्ही मराठीवर मेजवानी ह्या कार्यक्रमात पाहिली होती. त्यात मुळ पाकृत, मिश्रणात भरडसर काळीमिरी पावडर व अख्ख्या बडीशेपचा वापर केला होता. मी काळीमिरी पावडर घातली नाही व बडीशेपची भरड पावडर घातली आहे. आणी हो ह्यात कुठलेच चिजाळलेले अंडे घातले नाहीये, ते घालून कसे लागेल माहीत नाही , त्यावर कुठलेच वैदिक संस्कार केलेले नाही , जसे बनविले तसे दिले आहे ;) कृ ह घे हे वे सां न :)