Skip to main content

हात तुझा हातात......

लेखक अगस्ती यांनी बुधवार, 19/12/2007 21:55 या दिवशी प्रकाशित केले.
हात तुझा हातात एकदा.... क्षणभर दे मजला नंतर जर वाटले तुला तर....अंतर दे मजला नकोस बांधू कुंपण कारा सभोवती माझ्या झुळझुळणारा वारा मी, तू...... अंबर दे मजला सत्ता संपत्ती अन लौकिक काय करू देवा? आनंदाने जगण्यापुरती.... भाकर दे मजला मनोरथाचे अश्व दौडती अजूनही माझ्या संपव माझे विश्व एकदा...ठोकर दे मजला कसे जमावे माझे येथिल परक्या उपर्‍यांशी? माय मराठी ज्यांची ते ते...मैतर दे मजला किती राहिले सांग अजूनी जगायचे येथे असेल जर होकार द्यायचा...लवकर दे मजला आचमनाला इथे 'अगस्ती' कधिचा बसलेला दे ! दे ! नियती दु:खाश्रूंचा... सागर दे मजला ----अगस्ती
लेखनविषय:
वाचने 10879
प्रतिक्रिया 11

प्रतिक्रिया

विसोबा खेचर बुधवार, 19/12/2007 22:12
सत्ता संपत्ती अन लौकिक काय करू देवा? आनंदाने जगण्यापुरती.... भाकर दे मजला कसे जमावे माझे येथिल परक्या उपर्‍यांशी? माय मराठी ज्यांची ते ते...मैतर दे मजला आचमनाला इथे 'अगस्ती' कधिचा बसलेला दे ! दे ! नियती दु:खाश्रूंचा... सागर दे मजला वा अगस्ती महाराज! फारच सुरेख. वरील ओळी विशेष भावल्या... -- तात्या.

धनंजय बुधवार, 19/12/2007 22:57
येथे मिसळपावावर बह्'र वगैरेबद्दल उत्तम मार्गदर्शन मिळू शकेल. स्वागत.

सर्किट (verified= न पडताळणी केलेला) बुधवार, 19/12/2007 23:10
अगस्ती, कविता आवडली. नकोस बांधू कुंपण कारा सभोवती माझ्या येथे कारा म्हणजे काय ? किती राहिले सांग अजूनी जगायचे येथे असेल जर होकार द्यायचा...लवकर दे मजला ही द्विपदी खूप आवडली. - सर्किट

बेसनलाडू बुधवार, 19/12/2007 23:38
नकोस बांधू कुंपण कारा सभोवती माझ्या झुळझुळणारा वारा मी, तू...... अंबर दे मजला किती राहिले सांग अजूनी जगायचे येथे असेल जर होकार द्यायचा...लवकर दे मजला आचमनाला इथे 'अगस्ती' कधिचा बसलेला दे ! दे ! नियती दु:खाश्रूंचा... सागर दे मजला कविवर्य, गझल फार आवडली. सर्कीटकाका, कारा = तुरुंग; कुंपण कारा = कुंपणासारखी कारा ; कुंपणरूपी कारा ; कुंपण किंवा/आणि कोणत्याही प्रकारचे बंधन या अर्थी? (आस्वादक)बेसनलाडू

प्राजु गुरुवार, 20/12/2007 00:09
अतिशय सुंदर आहे गझल... खूप आवडली.. खास करून खालील ओळी, किती राहिले सांग अजूनी जगायचे येथे असेल जर होकार द्यायचा...लवकर दे मजला आचमनाला इथे 'अगस्ती' कधिचा बसलेला दे ! दे ! नियती दु:खाश्रूंचा... सागर दे मजला आणखीही येऊद्यात अशाच एकापेक्षा एक सरस गझला... -प्राजु.

नंदन गुरुवार, 20/12/2007 06:00
गझल. शेवटच्या द्विपदी विशेष आवडल्या. नंदन (मराठी साहित्यविषयक अनुदिनी http://marathisahitya.blogspot.com/)

ध्रुव गुरुवार, 20/12/2007 11:38
फार सुरेख कविता... अजुनही येऊद्यत!!! -- ध्रुव

केशवसुमार गुरुवार, 20/12/2007 17:34
अगस्तीशेठ, बर्‍याच दिवसांनी आपली सुंदर कविता वाचायला मिळाली... कविता आवडली..अशीच वरचे वर हजेरी लावत रहा हि विनंती. आमचा दुसरा प्रतिसादइथे वाचा केशवसुमार

अगस्ती गुरुवार, 20/12/2007 18:52
गझल आवडल्याचे कळविल्याबद्दल सर्वांना धन्यवाद. अगस्ती शेवटून दुसरा शेर नीट वाचावा. वर वर जरी तो इश्किया वाटला तरी त्यात खूप खोल अर्थ आहे. ते मृत्यूला केलेले आवाहन आहे. अगस्ती

स्वाती राजेश गुरुवार, 20/12/2007 19:46
हात तुझा हातात एकदा.... क्षणभर दे मजला नंतर जर वाटले तुला तर....अंतर दे मजला ह्या ओळी विशेष आवडल्या.

प्रमोद देव शुक्रवार, 21/12/2007 09:15
किती राहिले सांग अजूनी जगायचे येथे असेल जर होकार द्यायचा...लवकर दे मजला हा शेर तर मस्तच आहे. ह्यावरून मला एक शेर आठवला... ये मरणा,येरे ये मरणा तुजवाचून मज वाटे जगण्याचे हे भय.