इनर पीस

"तुला निवड करावीच लागेल, हे शेवटचं सांगतेय" तिने कर्कशपणे ओरडून सांगितलं आणि टीव्हीवर कुंग फू पांडा बघत असलेल्या प्रीशाला ओढत घेऊन गेली. तो सुन्न होऊन त्या दिशेकडे पाहत होता.

शेजारच्या बेडरूममधून दाबून धरलेला एक हुंदका पदर चुकवून बाहेर आला आणि बरंच काही सांगून गेला.
अशी निवड करता येते? दोन्हीपैकी एक? आणि ती निवड करायचा हक्क मला आहे? आणि एकाला निवडायचे मग दुसर्‍याचं काय करायचं? कसं शक्य आहे? आणि निवडलं तरी हे इथेच थांबेल? पूर्वी थांबलंय?

त्याचं डोकं गरगरू लागलं. क्षणाक्षणाला विस्फोट होत होते. प्रीशाचं टिपेला पोचलेलं रडणं त्यात भर घालत होते. तो फ्लॅटच्या गॅलरीमध्ये मोकळ्या हवेसाठी आला..

"इनर पीस.. इनर पीस" टीव्हीवर मास्टर शिफू शिष्याला आयुष्याचं मर्म शिकवत होता.
"एक्झॅटली! हेच तर हवं आहे."

२१ च्या मजल्यावरून दूरवर दिसणार्‍या लखलखत्या दृश्याकडे बघत त्याच्या मनात विचार आला. त्याने खाली डोकावून पाहिलं तर काळी मिट्ट शांतता होती
आणि
"इनर पीस ..इनर पीस" पुटपुटत त्याने स्वतःला त्या अंधार्‍या जगात झोकून दिले.