मी अधित..... ओळखलत का? सहा वर्षापुर्वी शाळेत तुमची भेट झाली होती. 'वंडर बॉय' चे बक्षिस तुमच्या हस्ते मिळाले होते. आज मी इंजिनियरिंग च्या शेवटच्या वर्षाला आहे. दोन वर्षापासुन मी एमबीए ची तयारी करतोय. अहमदाबाद मधे अ‍ॅडमिशन नक्की मिळेल. तुमचे ते 'कंपार्ट्मेंट' चे वाक्य आजही आठवते. मुख्याध्यपकांनी नंबर दिला. तुमचा एक सल्ला हवा आहे. दोन वर्ष नोकरी करावी का सरळ एमबी ए ला अ‍ॅडमिशन घ्यावी. वर्क एक्सपिरियन्स चा फायदा नक्कीच आहे. पण... आई बाबा दोघेही नोकरी म्हणताहेत. ग्रॅज्युएशन पर्यंत सर्व काही दिले, आता स्वःत चे स्वतः बघ असे म्हणताहेत. एमबीए ला लागणारे पैसे मी देणार नाही असे बाबा म्हणताहेत. दहावीत पोस्ट ग्रॅड. शिवाय नोकरी करायची नाही असे दोघेही म्हणत होते. तस दहावी पर्यंत सगळ सुरळित होत. दहावी च्या सुट्टीत एका लग्नाला गेलो होतो. तिथे बाबांच्या मित्राची गाठ पडली. त्यांची लाइफ स्टाइल बघुन बाबांमधे आमुलाग्र बदल झाला. कुठे तरी स्वतः ला कमी समजायला लागले. मग काय? शेअर मार्केट मधील डेली ट्रेडींग च्या मागे लागले. त्यात आई पण थोडीशी वाहवली. घरी आल्यावर बाबांशी मस्त गप्पा व्हायच्या. आता चॅनेल चे स्टॉक स्पेक्युलेटर्स दोस्त झाले. हात पाय धुउन शुभं करोती म्हटल्याशिवाय आई जेवण देत नसे. अचानक जेवणामधे हँबरगर कधी आले ते कळलेच नाही. मंदी मधे होत्याचे नव्हते झाले. आईला नोकरी करणे भाग पडले. जरा सावरतो न सावरतो तो पर्यंत परत एकदा मोठा फटका बसला. घर विकायची पाळी आली. बाबांना दारु चे व्यसन लागले. घरात भांडणे होउ लागली. एकदा रात्री आई पोटाशी घेउन ढसाढसा रडली. थोड्या दिवसांनी लक्षात आले, बाबांनी आईला 'पणाला' लावले होते. मला समजत होते पण मी न समजल्यासारखा राहत होतो. आईला बर वाटायला. आता आई पण संपुर्ण निर्विकार झालेली आहे. तुझे तु बघ म्हणते. मी जर नोकरी ला लागलो तर अजुनही हे संभाळुन घेइन असे कधी कधी वाटते. किंवा त्यांना त्याच्या नशिबावर सोडुन मी माझे करियर करायला बाहेर पडावे असे पण वाटते. काय करु सांगा? क्लास ला हवेत असे म्हणुन मी बाबाकडुन घेतलेले पैसे मी योग्य प्रकाराने इन्वेस्ट केले. आज माझ्याकडे स्वतःचे ३ लाख रुपये आहेत. तशी मला आर्थिक आधाराची गरज नाही. पण मी बाहेर पडलो तर आमचे घर संपुर्ण उध्वस्त होइल. काय करु? दोघाचे परस्पर संबध टोकाला गेले आहेत. एका घरात राहुन वेगवेगळे. ऑन द वे ऑफ सेल्फ डिस्ट्रक्शन, अगदी सर्वार्थाने. कळतय ना मी काय म्हणतोय ते? सांगा काय करु. मुलाचे कर्तव्य की भविष्य? काय करु? ----------------------------------------------------------------------------------------- "Make Two compartments. In one compartment 'what your parents have done for you'. In second what your parents are not able to do for whataever reason. Second compartment will be always heavy"