Skip to main content

शेतकरी गीत: आज सण हाय बैलपोळा

लेखक पाषाणभेद यांनी बुधवार, 08/09/2010 18:48 या दिवशी प्रकाशित केले.
शेतकरी गीत: आज सण हाय बैलपोळा
शिंगे घासली बाशींगे लावली माढूळी बांधली म्होरकी आवळली तोडे चढविले कासरा ओढला घुंगुरमाळा वाजे खळाखळा हो खळाखळा आज सण हाय बैलपोळा ||१|| गोंडे बांधले वेसनी घातल्या छमच्या गाठल्या चवर ढाळली शिक्के उठविले गेरू फासला घुंगुरमाळा वाजे खळाखळा हो खळाखळा आज सण हाय बैलपोळा ||२|| नाव लिहीले झेंडूहार घातला झुली चढविल्या पैंजण घातले पट्टा आवळला फुगे बांधले घुंगुरमाळा वाजे खळाखळा हो खळाखळा आज सण हाय बैलपोळा ||३|| घुंगरू वाजविले बेगड चिकटवली माठोठ्या बांधल्या गाववेस फिरवीले गोडधोड केले सासुसुनाने ओवाळले नैवेद्य दावला घुंगुरमाळा वाजे खळाखळा हो खळाखळा आज सण हाय बैलपोळा ||४|| - पाषाणभेद (दगडफोड्या) ०८/०९/२०१०
काव्यरस
शांतरस
लेखनविषय:
वाचने 6043
प्रतिक्रिया 10

प्रतिक्रिया

गणेशा बुधवार, 08/09/2010 21:32
शब्दबद्ध केलेली प्रत्येक वस्तु चित्र रुप होत आहे . अप्रतिम

पक्या बुधवार, 08/09/2010 21:48
छान जमलीये कविता. पाभे भाऊ, तुमच्याकडे गावाकडील संबंधित गोष्टींचा भरपूर शब्दसंग्रह दिसतोय आणि अनुभव ही. बरेच नवीन शब्द दिसले. जरा अर्थ पण सांगा की ..जसे माढोळी, म्होरकी , कासरा, छमच्या. चित्रासकट अर्थ दिलात तर अजून छान. धन्यवाद.

पाषाणभेद गुरुवार, 09/09/2010 09:59
pola पोळ्याच्या दिवशी बैल सजवण्याचे साहित्य आहे ते. कासरा हे बैलांच्या मानेत असणारी दोरी आहे. माथोटी पण तशीच. बाकीचे साहीत्य म्हणजे बैलांचे दागीने आहेत पोळ्याचे.

चिगो गुरुवार, 09/09/2010 13:02
छान कविता... गावात घरी केलेला पोळा आठवला. आमच्या घरी पोळ्याच्या आदल्या दिवशी बैलाला आमंत्रण देतात... बैलाला धुवून त्याला तेल-हळद लावुन त्याची पुजा केली जाते, आणि पोळ्याचं आमंत्रण देतात.. त्यावेळी म्हटल्या जाणार-या ह्या ओळी.... "आज आवतण घे उद्या जेवाले ये.. तुत्यानं ढोसलं, तुले कास-यानं व्हढंलं त्याचा राग नको मानू.. आज आवतण घे उद्या जेवाले ये..." पोळ्याच्या शुभेच्छा...!!