Skip to main content

हा शब्दांच्या गुणसुत्रांचा दोष असावा

लेखक अनिरुद्ध अभ्यंकर यांनी शुक्रवार, 06/08/2010 19:26 या दिवशी प्रकाशित केले.
हा शब्दांच्या गुणसुत्रांचा दोष असावा स्वप्नलिपीचा अर्थ कसा कोणा समजावा कधीतरी झाडांची भाषा मला कळावी कधीतरी मज अबोल चाफाही उमजावा जन्म-मरण ह्या दोन मितीच्या प्रतलामध्ये जगण्याचा सारांश कसा सांगा बसवावा युगे बदलली काळ बदलला अरे विठ्ठला एक आयडी ट्विटरवर तूही उघडावा किती खोल मी अजून जावे मनात माझ्या कधीतरी तळ मला अता त्याचा लागावा उगाच चर्चा मी तेव्हा केली माझ्याशी चुकले माझे अखेर हा निष्कर्ष निघावा अता एकदा संपावी काव्याची वेणा मेंदूमधला शब्दांचा दंगा थांबावा
लेखनविषय:
वाचने 4077
प्रतिक्रिया 13

प्रतिक्रिया

llपुण्याचे पेशवेll शुक्रवार, 06/08/2010 19:38
हम्म .. थोडेसे विस्कळीत वाटले. हा विस्कळीत पणा आपल्या विमनस्क मनःस्थितीदर्शक असावा का? (तळ शोधणारा)पेशवे

मेघवेडा शुक्रवार, 06/08/2010 19:53
सहमत आहे. संवेदनशील वाटणारं काव्य चौथ्या कडव्याला (कडवंच ना? का आणि काही शब्द आहे?) भरकटल्यासारखं वाटलं. उगाच जबरदस्ती रांगेत बसवल्यासारखं वाटलं ते. बाकी 'जन्म-मरण या दोन मितीच्या प्रतला'बद्दल जाणून घ्यायला आवडेल. कल्पना छान आहे मात्र योग्य वाटत नाही आहे. पटत नाही आहे.

चतुरंग शुक्रवार, 06/08/2010 19:43
अतिशय सुंदर गजल! :) हा शब्दांच्या गुणसुत्रांचा दोष असावा स्वप्नलिपीचा अर्थ कसा कोणा समजावा मतल्यातच एकदम गार! (स्वप्नलिपीतला)चतुरंग

मिसळभोक्ता शनिवार, 07/08/2010 03:49
युगे बदलली काळ बदलला अरे विठ्ठला एक आयडी ट्विटरवर तूही उघडावा केशवसुमारांच्या विडंबनातून कट-पेस्ट झालेले दिसते. हे वगळल्यास बाकी छान. फक्त शेवटी "दंगा" ऐवजी "गुंता" छान वाटले असते.

धनंजय शनिवार, 07/08/2010 21:16
अनेक द्विपदी आवडल्या, पण असेच काही वाटले. तरी अ.अ. परत आल्याबद्दल आनंद वाटतो.

अनिरुद्ध अभ्यंकर बुधवार, 11/08/2010 00:24
मिभोशेठ, धनंजयशेठ,ओगलेशेठ, प्रतिसादाबद्दल आभार.. मध्ये राजकीय नेते आणि अभिनेते यांच्यात ट्विटर वर आयडी काढण्यात जी चुरस लागली होती त्यावरून हा शेर सुचला होता... विडंबनातला वाटला :( हरकत नाही.. शब्दांनी भंडावून सोडणे हा अर्थ अपेक्षीत होता म्हणून 'दंगा' वापरला गुंत्या मध्ये भंडावणे असा अर्थ अभिप्रेत होत नाही असे वाटले..

अविनाश ओगले शनिवार, 07/08/2010 20:13
युगे बदलली काळ बदलला अरे विठ्ठला एक आयडी ट्विटरवर तूही उघडावा केशवसुमारांच्या विडंबनातून कट-पेस्ट झालेले दिसते. असेच म्हणतो. बाकी झकास.

अनिरुद्ध अभ्यंकर बुधवार, 11/08/2010 00:25
प्रतिसाद दिलेल्या आणि प्रतिसाद न दिलेल्या सर्व वाचकांचे मनापासून आभार!! (आभारी)अनिरुद्ध अभ्यंकर