साहित्य २ माध्यम आकाराचे बांगडे, साफ करून चिरा मारून ३ ते ४ सुक्या लाल मिरच्या १० ते १२ लसूण पाकळ्या १ इंच आलं १ मोठा चमचा काश्मिरी लाल तिखट १ चमचा हळद १ चमचा जिरं १ चमचा काळीमिरी १ दालचिनी ३ ते ४ लवंग १ लिंबा एवढा चिंचेचा गोळा ३ ते ४ चमचे व्हिनेगर चवीनुसार मीठ १ चिमूट साखर (ऐच्छिक) २ चमचे तेल, शॅलो फ्राय साठी कृती पोर्तुगीज मध्ये रेषादो म्हणजे स्टफ्फ्ड. एखाद्या माश्या (बांगडा किंवा पापलेट) मध्ये तिखट लाल मसाला भरून तो शॅलो फ्राय करणे हि गोव्या मधली उत्कृष्ट पाककृती. हा रेषादो मसाला अजून बऱ्याच मत्स पाककृतींन मध्ये वापरता येतो. व्हिनेगर च्या वापरामुळे हा मसाला काही महिने आरामात टिकतो. ह्या मसाल्याची बरेच प्रकार घरोघरी प्रचलित आहेत, पण सर्वसाधारणपणे, व्हिनेगर मध्ये खडे मसाले, लाल मिरच्या चिंच, आलं लसूण इत्यादी घालून त्याची एक घट्ट पण स्मूथ पेस्ट बनवले जाते. [मुलं खाणार असल्यामुळे मी लाल मिरच्यांचे प्रमाण कमी ठेवले, आणि त्या ऐवजी काश्मिरी लाल तिखट वापरलय, ह्याने आपल्याला हवा तो रंग मस्त येतो] बांगडे साफ करून धुवून कोरडे करून घ्या. आलं, लसूण बारीक चिरून घ्या. एका भांड्यात बांगडे, तेल आणि साखर सोडून इतर सगळे जिन्नस कालवून घ्या. हे मिश्रण साधारण २५ ते ३० मिनिटे मुरत ठेवा. मिश्रण मिक्सर मधून वाटून घ्या. लागलंच तर थोडं पाणी घालून घटसर पण मऊसूद वाटून घ्या. [हा मसाला साठवून ठेवायचा असेल तर पाणी न वापरता तेल किंवा थोडंसं व्हिनेगर वापरा]. (ह्याला थोडा वेळ लागेल, पण हे मिश्रण अगदी स्मूथ झाले पाहिजे). वाटताना एक चिमूट साखर घाला. [आपण चिंच आणि व्हिनेगर वापरतोय, त्यांचा आंबटपणा थोडासा बॅलेन्स करायला साखर मदत करते]    ह्या मिश्रणाचे ३ ते ४ चमचे बांगड्याना आतून बाहेरून व्यवस्थित लावून घ्या. आता हे मसाला लावलेले बांगडे साधारण २० ते २५ मिनिटे मुरत ठेवा. तव्यावर २ चमचे तेल टाकून तवा गरम झाला कि बांगडे दोन्ही बाजूने खरपूस तळून घ्या.   [साधारण ३ ते ४ मिनिटे एका बाजूला, हे तुमचे मासे किती छोटे किंवा मोठे आहेत ह्यावर अवलंबून आहे, मासे पटकन शिजतात, हे वेगळे सांगायला नकोय. अर्थातच, तुम्ही हे मासे एयर फ्रायर मध्ये तेलाचा स्प्रे मारून एयर फ्राय करून घेऊ शकता, किंवा तेलाचे बोट लावून ओव्हन मध्ये बेक सुद्धा करून घेऊ शकता.]. असे खरपूस शॅलो फ्राय केलेले मासे गरम गरम सर्व्ह करा! ह्या बरोबर भात आणि सोलकढी कॉम्बिनेशन एकदम भारी! [मसाला वाटताना, तो खूपच आंबट झालाय असे मला वाटत होते, पण बांगड्याला लावून तो मुरवल्यावर, आणि खाताना तो आंबटपणा एवढा जाणवत नाही, एक छान तिखट आंबट मसालेदार चव माश्याला येते. हाच मसाला कोळंबी लावून, त्यांना रवा आणि तांदळाचे पिठात घोळवून, शॅलो फ्राय करून सुद्धा छान लागतात]