साहित्य- १ वाटी हिरवे वाटाणे, १ मोठा चमचा धने, १ छोटा चमचा जिरे, ५-७ लवन्गा, ८-१० मिरी, १ वाटी सुके/ओले खोबरे, १ इन्च आले, १०-१२ पाकळ्या लसूण, ५-६ कान्दे, तेल, हळद, तिखट, डाळीचे पीठ, भावनगरी, बारीक शेव, पाणी, मीठ, ७-८ कढीपत्त्याची पाने, पाव कृती- आदल्या दिवशी वाटाणे भिजत घालावेत. मिसळ करतेवेळी ते उकडून घ्यावेत. ४ कान्दे उभे चिरून घ्यावेत. खोबरे किसून घ्यावे. मग धने, जिरे, लवन्गा, मिरी, कान्दा, खोबरे भाजून वाटून घ्यावे. आले-लसणीची पेस्ट करून घ्यावी. एका कढईत तेल टाकून त्यात आले-लसणीची पेस्ट व वाटलेला मसाला घालावा व परतून घ्यावे. थोडी हळद घालून त्यात वाटाणे घालावेत. पाणी घालावे. आवडीनुसार मीठ व तिखट घालावे. डाळीच्या पिठात पाणी घालून त्याची गुळगुळीत पेस्ट करून कढईत घालावी. कढीपत्त्याची पाने घालून १ उकळी आणावी. तर्री- एका कढल्यात तेल घालून ते तापल्यावर त्यात थोडी हळद व आवडीप्रमाणे तिखट घालून ग्यास लगेच बन्द करावा. ही तर्री कढईतल्या मिसळीवर ओतावी. एका बोल मधे मिसळ घालून त्यावर भावनगरी, बारीक शेव, बारीक चिरलेला कान्दा घालून पावाबरोबर गरम गरम खावयास द्यावी.