लागणारा वेळ: 3० मिनिटे लागणारे जिन्नस: • २५० ग्रॅ. ओली हळद • आले तुमच्या आवडीप्रमाणे घ्या • 3 लिंबू मध्यम आकाराचे • २ गजर मध्यम आकाराचे • १५ ते २० लसूण पाकळ्या (लसूण पाकळ्या लहान असतील तर आवडीप्रमाणे कमीजास्त करू शकता) • १० ते १५ स्वतःच्या आवडीप्रमाणे काही हिरव्या मिरच्या. • 3/4 कप लोणच्याचा मसाला (मी आईने घरी बनविलेला लोणच्याचा मसाला पाठवला होता तो वापरला आहे. तुम्ही रामदेव, बेडेकर, प्रवीण कोणताही लोणच्याचा मसाला वापरून सुद्धा करू शकता.) क्रमवार पाककृती: 1. हळद शक्यतो ओलसर असेल तर नीट कोरडी करून घ्या, मग तिचे लहान तुकडे करून घ्या. 2. आले शक्यतो कोवळे, बिनरेषांचे घ्या. त्याचेही तुकडे करून घ्या. 3. लिंबाच्या लहान फोडी करून घ्या. 4. गजर सुद्धा नीट कोरडे करून त्याचे सुद्धा हळदी प्रमाणे लहान तुकडे करून घ्या. 5. वरील हे सगळे जिन्नस एक काचेच्या डब्यात घेऊन त्यात थोडे मीठ टाकावे आणि रात्रभर तसेच बाहेर राहू ध्यावे. (मी मीठ अगदी थोडेसेच घातले कारण मला मिठाचा अंदाज नीट येणार नाही हे ओळखून लोणच्याच्या मसाल्यात आईने मीठ घालून पाठवले होते. माझ्या पाक कौशल्याबद्दल ती भलतीच जागरूक असते :) . 6. दुसऱ्या दिवशी एका भांड्यामध्ये दोन लहान चमचे तेल गरम करून त्यात लसूण आणि मिरची थोडावेळ मंद आचेवर तळून घ्यायची. शक्यतो रंग बदलू न देता तळून घ्यावे आणि बाजूला काढून ठेवावे. 7. त्याच भांड्यामध्ये पुन्हा तसेच दोन लहान चमचे तेल गरम करून त्यात लोणच्याचा मसाला मंद आचेवर तळून घ्यावा पण शक्यतो रंग बदलू न देता. 8. सगळे पदार्थ पूर्णतः थंड झाले की सर्व प्रथम मिरची, लसूण, ओली हळद, गजर, लिंबू, आले सर्व मिश्रण हलक्या हाताने एकत्र करा. हात, वाडगा, चमचा सगळे कोरडे असू द्या. अजिबात पाण्याचा अंश असता कामा नये. 9. आता वरील मिश्रणात थंड झालेला लोणच्याचा मसाला हलक्या हाताने एकत्र करा. 10. तुमच्या आवडीप्रमाणे वरून थोडेसे ऑलिव ऑइल टाकू शकता. 11. दोन दिवस बाहेरच झाकून ठेवा आणि दिवसातून एक दोन वेळा चमच्याने मिक्स करत रहा. तितक्या वेळात ते मुरेल. 12. आणि मग हे लोणचे काचेच्या बरणीत भरून फ्रीज मध्ये ठेवावे. १५ दिवसांनी हे लोणचे तुम्ही खाण्यासाठी घेऊ शकता. अधिक टिपा: • हे लोणचे मी स्वतः बनवले आणि माझा पहिलाच लोणचे बनवण्याचा प्रयोग सफल झाला. स्वयंपाकात अनुभवाने माझ्यापेक्षा खूप श्रेष्ठ अश्या माझ्या दोन मैत्रिणींकडून शाबासकी सुद्धा मिळवली. • हे लोणचे अगदी साधे वरणभात याबरोबर अप्रतिम लागते. • मी कधी कधी पास्ता अगदीच mild बनला असेल तर थोडीशी चव येण्यासाठी बरोबर घेऊन खाते. कदाचित आईच्या ह्या पारंपरिक लोणच्याचा हा अपमानच असावा. माहितीचा स्रोत आणि पाककृतीचे सारे श्रेय माझी आई शुद्धलेखना बाबत मदत करण्यासाठी श्रीरंग_जोशी ह्यांचे मनापासून आभार. पाककृतीचे लेखन आवडले असेल तर त्याचे पूर्ण श्रेय श्रीरंग_जोशी ह्यांना. हे माझे पहिलेच online मराठी लेखन आहे. माझ्या लेखनात काही चुका असतील तर मला नक्की सांगा.