साहित्यः २ रेडीमेड चॉक्लेट स्पाँज केक मिक्स (हे नाही मिळाल्यास बेसीक स्पाँज केकची पाकृ खाली दिली आहे) १२० मिली पाणी (केक मिक्सच्या पाकिटावर पाणी आणी अंड्याचे जसे प्रमाण दिले आहे तसे घ्यावे) ४ अंडी फ्रेश क्रीम २-३ चमचे साखर व्हॅनिला एसेन्स चेरीज सजावटसाठी किसलेले चॉक्लेट केशर रसगुल्ले (तुम्ही पांढरे रसगुल्ले ही वापरु शकता) पाकृ: ओव्हन १७० डिग्री सेंटीग्रेडवर प्री-हीट करा. एका मिक्सींग बाऊल मध्ये एक पॅकेट केक मिक्स, २ अंडी व १२० मिली पाणी एकत्र करुन फेटून घेणे. केक टीनला बेकींग पेपर लावून घ्यावा किंवा बटर ने ग्रीज करून घ्यावे. टीनमध्ये फेटलेले केकचे मिश्रण ओतावे व प्री-हीट केलेल्या ओव्हनमध्ये केक टीन ठेवून २०-२५ मिनिटे बेक करणे. विणायची सुई घालून पहावी, सुई स्वच्छ निघाली म्हणजे केक तयार झाला समजावे. केकला कुलिंग रॅकवर गार होण्यासाठी काढून ठेवावे. केक गार होतोय तोपर्यंत क्रीम व्हिप करुन घ्यावे. एका भांड्यात बर्फाचे पाणी घ्यावे व त्यावर मिक्सींग बाऊल ठेवावा. त्यात गार असलेले फ्रेश क्रीम ओतावे व बीटरने २-३ मिनिटे फेटावे. (असे केल्याने क्रीम लवकर फेटले जाते) आता त्यात चवीपूरती साखर व १ टीस्पून व्हॅनिला एसेन्स घालावे. पुन्हा २-३ मिनिटे क्रीम घट्ट व सॉफ्ट पिक्स तयार होईपर्यंत फेटावे. केक पूर्ण गार झाला की त्यावरचा क्रस्टी भाग कापून घ्यायचा आहे, असे केल्याने केक एक-मेकांवर ठेवायाला सोपे जाते. केकला केक बोर्ड्वर ठेवून त्यावर रसगुल्ल्याचा पाक थोडा थोडा करुन घालावा, म्हणजे केक मॉईस्ट राहील. केकवर फेटलेले क्रीम पसरवून घ्यावे. त्यावर अर्धे कापलेले रसगुल्ले व चेरीज लावून घ्यावे. थोडे किसलेले चॉक्लेट लावावे. आता त्यावर केकचा दुसरा भाग हलक्या हाताने दाबून ठेवावा व पुन्हा त्यावर रसगुल्ल्याचा पाक लावून घ्यावा. केकला सगळीकढून क्रीम लावून घ्यावे. कडेला किसलेले चॉक्लेट लावून घ्यावे. मी थोडेसे फेटलेले क्रीम पायपींग बॅगमध्ये काढून केकवर सजावट केली. वर रसगुल्ले, चेरीज व चॉक्लेट ने सजावट करावी. तयार केक फ्रिजमध्ये थंड होण्यासाठी ठेवा. हा केक तुम्ही आज तुमच्या प्रियजनांबरोबर प्रेमदिन मस्त साजरा करून खा :) नोटः ज्यांना केक मिक्स सहज उपलब्ध नाही त्यांनी घरीच स्पाँज केकचे मिश्रण तयार करावे. त्यांनी १७५ ग्राम मैदा चाळून घ्यावा. १२५ ग्राम बटर आणी १२५ ग्राम साखर एकत्र हलके होईपर्यंत फेटावे. त्यात एक-एक करत २ अंडी घालून चांगले फेटावे. १ टीस्पून व्हॅनिला एसेन्स घालून पुन्हा फेटावे. त्यात चाळून घेतलेला मैदा ५ टेस्पून कोको पावडर थोडे थोडे करून घालावे व मिश्रण फोल्ड करावे. पुढिल कृती वर दिल्याप्रमाणे करावी.