बाळ्या, "बघता बघता तू किती मोठा झालास. माझा अजूनही विश्वास बसत नाही की कालपरवा पर्यंत अंगणात खेळणारं माझं बछडं आज नोकरीनिमित्ताने दुसरीकडे भुर्र उडून गेलं आहे.", असं बोलत डोळे टिपून तुझी आई मला बोर करत असते. पण होईल नीट हळूहळू. तुझा प्रवास चांगला झाला असेलच. जायच्या आधी तुझ्या आईच्या बडबडीमुळे काही गोष्टी सांगायच्या राहून गेल्या त्या लिहितोय. मानापमान - नोकरीत बॉसच्या मानापमानाच्या भावना फार तीव्र असतात, पण बॉसने दिलेल्या शिव्यांनी आपला अपमान होत नसतो हे लक्षात ठेव. संस्कार -एखाद्या दिवशी पार्टीत जास्त प्यालास तरी जेवण करायला चुकू नकोस. फेरविचार - कुठल्याही मैत्रिणीबरोबर खरेदी करायला जायच्या आधी हजारदा फेरविचार कर आणि तरीही गेलास तर पाकीट घरी ठेवून जा. स्तुती - जो पर्यंत हातात काही पडत नाही तोपर्यंत कोणी कितीही कौतुक केले तरी काहीही उपयोग नाही हे तुला माहितीच आहे. कष्ट - ऑफिसमधल्या कामाव्यतिरिक्त चार-सहा महिन्यांतून तुझ्या राहत्या जागेत एखादा झाडू मारत जा. कपडे धुवायला बाई लावलीस तर कपडे धुवायला टाकायचे कष्ट घे. वाचा -शिवीला उत्तर शक्यतो शिवीनेच दे. उगाच हाणामार्‍या करू नको. तुझ्या आईला महिन्या-दोनमहिन्यांनी तरी फोन करत जा. बाबा. ता.क.: तुझी आई मागं लागली म्हणून पत्र लिहीले. चिडू नको. फाडून टाक.