नमस्कार मंडळी, आज खूप दिवसांनी येत आहे. सोबत आणला आहे रोजच्या जेवणातला साधासाच एक पदार्थ. रोजच्याच आमटीचा कंटाळा आला की करावं असं उडदाचं घुटं किंवा उडदाची आमटी. साहित्यः- उडदाची डाळ १ वाटी हरभर्‍याची डाळ १ मोठा चमचा कोरडं खोबरं किसून साधारण पाव वाटी लसूण ४-५ पाकळ्या, आलं एक पेराएवढं, मीठ, चिंचेचा कोळ १ मोठा चमचा. फोडणीचे साहित्यः- तेल, मोहरी, जिरं, कढिपत्ता, हिरवी /लाल मिरची, कोथिंबीर कृती- उडदाची डाळ व हरभर्‍याची डाळ कुकरात ४ शिट्ट्या करुन शिजवून घ्यावी. एका कढल्यात कोरडं खोबरं आणि जिरं खरपूस भाजून घ्यावे. शिजलेली डाळ डावेनी घोटून एकजीव करुन घ्यावी. आता त्यात अंदाजे पाणी घालून उकळवण्यास ठेवावी. भाजलेलं जिरं आणि खोबरं त्यात चुरुन घालावे. चिंचेचा कोळ,चवीप्रमाणे मीठ घालावे. एका कढल्यात तेलाची फोडणी करावी. त्यात कढिपत्ता, हिरवी /लाल मिरची, कोथिंबीर, आलं, लसूण घालावे. लसूण खमंग होईपर्यंत परतावे. आता उकळी आलेल्या मिश्रणात ही फोडणी घालावी. अजून एक उकळी येऊ द्यावी. वाफाळत्या भातावर गरमागरम घुटं घेऊन भात ओरपावा. --शाल्मली.