सांग कधी कळणार तुला भाव माझ्या मनातला?
रंग कधी दिसणार तुला लाजणाऱ्या फुलातला?
सांग कधी कळणार तुला भाव माझ्या मनातला? /१/
गंधित नाजुक पानांमधुनी, सूर छेडिते अलगद कुणी
अर्थ कधी कळणार तुला धुंदणाऱ्या सुरातला
सांग कधी कळणार तुला भाव माझ्या मनातला?/२/
निळसर चंचल पाण्यावरती, लयीत एका तरंग उठती
छंद कधी कळणार तुला नाचणाऱ्या जलातला
सांग कधी कळणार तुला भाव माझ्या मनातला?/३/
जुळता डोळे एक वेळी, धीट पापणी झुकली खाली
खेळ कधी कळणार तुला दोन वेड्या जीवातला
सांग कधी कळणार तुला भाव माझ्या मनातला? /४/
*********************************
विडंबन
सांग कधी घटणार मला घेर तुझ्या कमरेचा?
सैल कधी बसणार तुला सूट आपल्या लग्नातला?
सांग कधी घटणार मला घेर तुझ्या कमरेचा?.../१/
रंगीत पट्टेरी शर्टामधुनी, पोट सांडते सगळीकडूनी
ताण कधी कळणार तुला कमरेवरच्या पट्ट्याचा
सांग कधी घटणार मला घेर तुझ्या कमरेचा?.../२/
कमनीय चंचल मैत्रिणी माझ्या, होऊन एक चिडवती तुजला
अर्थ कधी कळणार तुला बोचर्या टोमण्यातला
सांग कधी घटणार मला घेर तुझ्या कमरेचा?.../३/
उभे राहता काट्यावरती, काटा धावतो सत्वर वरती
धोका कधी कळणार तुला वाढणार्या वजनातला?
सांग कधी घटणार मला घेर तुझ्या कमरेचा?.../४/