मॉलमध्ये गेल्यावर माझं हे असं होतं ।
मोहाच्या हट्टापुढे गरजांचं हसं होतं ।।
आतमध्ये शिरताच माझ्या
साधेपणाचे पाश तुटतात ।
साऱ्या सुप्त इच्छांना मग
शक्यतेचे पंख फुटतात ।।
दिपून जातात डोळे, काही दिसेनासं होतं ।
मॉलमध्ये गेल्यावर माझं हे असं होतं...... ।।१।।
चोहीकडे दिसतात मला
जेव्हा वैभवाचे सडे ।
आणि लखलखणारी सुखं
रोखून बघतात माझ्याकडे ।।
कसं सामोरं जावं त्यांना
मला खरंच कळत नाही ।
माझं आणि पाकीटाचं, मत
काही केल्या जुळत नाही ।।
भर पावसात कोरडं राहावं, माझं अगदी तसं होतं ।
मॉलमध्ये गेल्यावर माझं हे असं होतं...... ।।२।।
अपेक्षांना समजावत मग
मी इच्छांशी भांडत राहतो ।
दोन्ही बाजू त्याच तरीही
नवं गणित मांडत राहतो ।।
सभोवतालच्या सगळ्यांना
हे समीकरण जमतं कसं ।
भांबावलेलं वास्तव इथे
आभासात रमतं कसं ।।
उत्तर याचं शोधताना माझं मन वेडंपिसं होतं ।
मॉलमध्ये गेल्यावर माझं हे असं होतं..... ।।३।।
स्वतःवरचा ताबा माझा
मला मनापासून भावतो ।
हसरा खिसा न थकता
रिकाम्या हातांना समजावतो ।।
आपल्याला जे खरंच लागतं
ते अगदी थोडं आहे ।
पण नेमकं ओळखायचं कसं
हेच खरं कोडं आहे ।।
साऱ्या घटनेचा प्रभाव
मग सरतो काही क्षणामध्ये ।
केवळ एकच प्रश्न उरतो
आणि माझ्या मनामध्ये ।।
फुलपाखराचं पुन्हा एकदा सुरवंट कसं होतं ।
मॉलमध्ये गेल्यावर माझं हे असं होतं ।
मोहाच्या हट्टापुढे गरजांचं हसं होतं ।।४।।
प्रतिक्रिया
1 Aug 2017 - 5:02 pm | चांदणे संदीप
कविता आवडली!
Sandy
1 Aug 2017 - 5:32 pm | पद्मावति
फारच मस्तं.
1 Aug 2017 - 8:14 pm | योगेश लक्ष्मण बोरोले
व्वा! मजा आली.
1 Aug 2017 - 11:51 pm | एस
कविता छान आहे. आवडली.
2 Aug 2017 - 2:02 pm | सानझरी
आवडली कविता.. मस्तं!!!
2 Aug 2017 - 5:53 pm | हृषीकेश पतकी
आपणा सर्वांच्या प्रतिसादाबद्दल खूप खूप आभार!!
2 Aug 2017 - 6:06 pm | संदीप-लेले
व्वा, छान ! आवडली
2 Aug 2017 - 8:29 pm | ज्योति अळवणी
मस्त
3 Aug 2017 - 12:33 am | रुपी
छान कविता. आवडली!
3 Aug 2017 - 11:22 pm | समाधान राऊत
शाबास रे भाई
7 Aug 2017 - 12:47 pm | हृषीकेश पतकी
पुन्हा एकदा सर्वांना धन्यवाद!