[शतशब्दकथा स्पर्धा] शाप

मोहिनी देवी सुन्न होऊन बसल्या होत्या. भविष्यातील भयंकर घटनांच्या चाहुलीने थरकाप झाला होता त्यांचा. ही जहागीर अजून किती बळी घेणार कळत नव्हते. सरकारांना परोपरीने सांगूनही जहागिरीचा मोह सुटत नाहीये..
का ही जहागीरच त्यांना सोडत नाहीये ? त्यांना आठवला तो सावत्र सासू राजलक्ष्मी देवींचा शाप..

आज खरं तर आनंदाचा दिवस..त्यांचा मुलगा अजिंक्यराजे ज्याला शिकायला दूर ठेवले होते तो त्याच्या पसंतीच्या मुलीला दाखवायला घेऊन आलाय.. राजश्री..मुलगी साध्या घरची पण स्वरूप सुंदर.. आपल्या घराण्यात शोभून जाईल..पण

त्या पुन्हा नखशिखान्त थरकापल्या.. राजश्री वाड्यात सराईता सारखी वावरतेय..अजिंक्य राजे आणि राजश्री जेव्हा आशिर्वाद घ्यायला मोठे सरकार नी सासूबाईंच्या तैलचित्रापुढे उभे राहिले.. तेव्हा राजश्री म्हणाली .. "मी आलेय"
आणि सासूबाई चित्रात हसल्याचा भास झाला.