मध्यरात्र उलटून गेलेली असते. वातावरणात खूप थंडी असते. एक बैलगाडी गावाबाहेरच्या निर्मनुष्य मैदानातून चंद्राच्या उजेडात गावाकडे जात असते. अचानक दोन्ही बैलाच्या मधोमध एक भयप्रद कुत्रा येतो आणि गाडीच्या खाली सरकतो आणि दोन्ही चाकांच्या मधोमध चालायला लागतो. बरोबर बैलांच्या वेगात वेग मिसळून तो चालतो. बैलगाडी हाकणारा (नायबा) बैलगाडीवर बसलेल्या दुसर्या माणसाला (होयबा) म्हणतो, "या गाडीखाली एक कुत्रा चालत आहे. त्या कुत्र्याला हाकलू नकोस आणि त्याचेकडे बघू नकोस गावची वेस (बाॅर्डर) येईपर्यंत! एकदा गावात शिरलो की हा कुत्रा नाहीसा होईल."
होयबा म्हणतो, "मी हे मानत नाही. कुत्र्याकडे समजा मी पाहिले किंवा हाकलले तर काय होईल? "
"सांगता येत नाही काय होईल पण त्यानंतर तू गावापर्यंत पोहोचणार नाही हे नक्की! या रस्त्यावर अनेक प्रकारच्या शिकारी सैतानांचा वास आहे. हा कुत्रा नाहीसा होईपर्यंत मी सुद्धा बैलगाडी मुळीच थांबवणार नाही"
"हॅट. नाही मानत मी. खोटे आहे ते."
"तुझे ते विचार तुझ्या मनात ठेव. फक्त काही विपरीत कृती करू नको."
"हट! मी नाही मानत. चल! गाडी चालव!" असे म्हणून तो आकाशाकडे पाहत बसून राहतो.
"अन काय रे. कुत्र्याला पाहून बैल बिथरत नाही का?"
"गप बस. पडून राहा. फालतू प्रश्न विचारू नको."
"आणि हे कुत्रं अजून एकदाही भुंकलं कसं नाही?"
"गप बस ना. गुमान पडून राहा. या सगळ्या अडथळ्यांकडे लक्ष देऊ नको. हे मैदान संपलं की जंगल लागेल. त्याला पार केले की नदी, पूल आणि मग गावची वेस येणार. मग हे अडथळे संपतील आणि आपण श्रीमंत होणार. विसरलास? "
चंद्राच्या उजेडात ती बैलगाडी पुढे जात राहते. पंधरा मिनिटे बैल, कुत्रा आणि गाडी या व्यतिरिक्त कुणीच हालचाल करत नाही. बैलगाडी वरचे "ते" दोघे अंगावर काळी चादर घेऊन निश्चल पडून असतात. बाजूला एक भरलेली थैली असते आणि एक काठी सारखे काहीतरी त्या थैलीजवळ ठेवलेले दिसते. त्या थैलीत अचानक हालचाल जाणवायला लागते. ती पिशवी हाताशी धरून बसलेला होयबा दचकतो.
"अरे नायबा, थैली हालतेय!"
"गप बस. लय गंमत करायची लहर येते तुला? "
"अरे खरंच सांगतोय!"
"आता गप बसतोस का थांबवू बैलगाडी आणि आणू कुत्र्याला पकडून तुझ्या बोडख्यावर बसवायला? च्या मारी! तूच गोळी घातली होती ना "त्याला" स्वतः च्या हाताने त्या नळीमधून! तूच केली ना शिकार त्याची! पुन्यांदा कसा जिवंत होईल तो? एकदा म्हणतो माझा या गोष्टींवर विश्वास नाय आणि एकदा म्हणतो मेलेला प्राणी जिवंत झाला?"
होयबा काही म्हणणार तेवढ्यात त्या थैलीतून एक विचित्र काळा प्राणी बाहेर निघतो आणि खाली उडी मारतो अन् कुत्र्याच्या मागोमाग बैलगाडी खाली तोही चालू लागतो.
नायबा होयबा वर संतापतो, "एक तर शिकार नीट करता येत नाय अनं एक थैली बी नीट सांभाळता येत नाय?" गमावलं ना सगळं. कसे मिळणार पैसे आता 'त्या'ला विकून?"
"अरे थांबव की गाडी! मी उतरतो आनं आणतो त्याला पुन्हा पकडून. मी नाय घाबरत त्या कुत्र्याकडं बघायला! "
"खबरदार. मी गाडी थांबवणार नाही."
"अरे थांबव की मूर्खा! " असे म्हणून होयबा बैलांचा दोर हातात घेऊन थांबवण्याचा प्रयत्न करतो पण नायबा त्याला बैलगाडीच्या खाली फेकतो. खाली पडल्यावर क्षणभर होयबा ची त्या कुत्र्याशी नजरानजर होते. कुत्रा पांढरा फटक असतो आणि करुणपणे रडत असतो. त्याचे लालजर्द डोळे प्रखरपणे चमकत असतात. पण होयबा कडे बघितल्यावर तो हसतो आणि होयबा चे डोळे कुत्र्याच्या डोळ्यांत काही क्षण बांधले जातात. तो विचित्र प्राणी कुत्र्याच्या मागे चालत असतो. अचानक होयबाला दूरवर बैलगाडी च्या मागच्या बाजूला दोन दिवे हालताना दिसतात. बहुदा एखादी कार असावी! तेवढ्यात तो प्राणी पुन्हा बैलगाडीवर उडी मारतो. होयबा त्या प्राण्याला पकडायला जाणार तेवढ्यात बैलगाडी बरीच पुढे निघून जाते. तो जिवाच्या आकांताने बैलगाडी मागे धावायला लागतो आणि बंदूक काढून घेण्यात तो यशस्वी होतो. पण प्राणी बैलगाडीवरच राहतो. त्यानंतर मात्र बैलगाडी अचानक बैलांना पंख फुटल्यासारखी वेगात धावायला लागते.
"थांबव गाडी लेका! "
"मला जान प्यारी आहे. पैसा नाय!"
"अरे पण त्यो प्राणी बैलगाडीवर आलाय. थांब माझ्यासाठी. एकट्यानेच पैसा खायचा विचार हाय का?"
नायबा आश्चर्याने मागे त्या प्राण्याकडे पाहतो....पण बैलगाडी थांबण्याच्या पलीकडे गेलेली असते. बैलांचे डोळे हिरवे झालेले असतात...
दूरवरच्या त्या कार मध्ये मागच्या सीटवर बसलेला मनुष्य साबू हा बाबू ड्रायव्हरला म्हणतो," अरे बाब्या, आपला बाॅस पण ना, किती काय काय करायला लावतो. आता पन्नास हजारासाठी हे डिक्की मधले प्रेत नदीत फेकाया लावतो ना तो. एकादा खून बीन केला असता ना मी. पण हे ओझं घेऊन जाऊन नीस्तं फेकून यायचं हे काम किती दिस करायचं काही कळंना! बाकी हे मात्र झ्याक झालं की आपल्या बॉस ला त्याची शिकार लई लवकर गावली. एकाच पिस्तुलाच्या गोळीत तो मेला आणि आता आपल्या डिक्कीत आहे बघ!"
बाबू म्हणतो, "गप बस साबू. एक तर हा ईलाका लई डेंजर हाय. मैदान पार केलं की एक जंगल लागंल. मग एक पूल. त्या पुलावरून हे पोतं खाली फेकायचंय. आपण नंतर बघू हे काम परत करायचं की नाय ते. आता या सुनशान इलाक्यातून लवकर पार व्हायचं. बास!"
"का रं? काय इशेष हाय या इलाक्यात?"
"आरं, आता नको ईचारू! रातच्याला सैतानाचं नाव घेतलं तर त्याला ताकद मिळते. या रस्त्यावर लई शिकारी सैतान असत्यात! गप बास! गप गुमान. शांती ठेव!"
"आरं, शांतीची कशाला याद दिली रे बुडख्या? कधी तिला भेटतो आसं झालंय!"
समोर दूरवर एक अंधुक मनुष्य आणि त्यासोबत एक अंधुक कुत्रा बघून बाबू करकचून ब्रेक दाबतो. दरम्यान साबू च्या उजव्या खांद्यावर एक खरबडीत हात पडतो आणि तो दचकून मागे पाहतो तर काहीच दिसत नाही. तेवढ्यात कुत्र्याच्या लाल डोळ्यांत बघून बाबूचे डोळे थिजतात. तो अंधुक माणूस बाबूला बंदुकीचा धाक दाखवून गाडीत बसू द्यायची "विनंती" करतो..."त्या बैलगाडीचा पाठलाग कर. चल लवकर!"
बाबू गाडी सुरू करतो आणि साबूला मदतीची विनंती करतो पण साबू निश्चल पडून असतो. कारच्या मागच्या सीटवरचा तो साबू त्या जिवंत झालेल्या प्रेताच्या हल्ल्यात मृत झाल्याचे बाबूला माहीत नसते.
चंद्राच्या उजेडात त्या मैदानावर सुसाट वेगाने धावणारी बैलगाडी, बैलगाडी खाली धावणारा तो जिवंत झालेला विचित्र प्राणी, त्यामागे धावणारी कार आणि कारमागे सुसाट धावणारा पांढरा कुत्रा!
हा विचित्र पाठलाग अर्ध्या तासानंतर जंगलात शिरतो. तो पाठलागाचा वेग आणि आवाज जंगलातील झाडांवर आरामात पहुडलेल्या घुबड आणि वटवाघुळे याना सहन होत नाही. ते एकमेकांकडे बघू लागतात, चिडतात आणि त्या बैलगाडी अन कार यावर झेपावतात. चंद्रप्रकाश जंगलातल्या झाडांमुळे क्षीण होत जातो. जंगलातल्या रस्त्यातून वरून तो काळ्या पक्ष्यांचा फक्त थवा सरकताना दिसतो एवढे त्या बैलगाडी आणि कारला झाकले जाते. पुढे अरुंद पुलावरून वेगामुळे बैलगाडी आणि नायबा पाण्यात खाली पडतात. तो विचित्र प्राणी पुलावरच असतो. नंतर त्यामागोमाग पक्ष्यांना घाबरलेला बाबू, साबू आणि होयबा हे सर्व कारवरचे नियंत्रण सुटल्याने कारसह त्या थंडगार पाण्यात पडतात. ते जिवंत झालेले प्रेत मात्र पुलावरच राहते. तो विचित्र प्राणी पुलाच्या कठड्यावर चढतो आणि आनंदाने पाण्यात पडलेले माणसं पाहून हर्षभरित होतो. दोन्ही बैल पाण्यातून निघून काठावर येतात आणि गावाकडे जायला लागतात. ते प्रेत सुद्धा वाकून पाण्यात बघत हसते. तो प्राणी आणि प्रेत एकमेकांकडे पाहून हसतात आणि पुन्हा जंगलाकडे चालू लागतात. लवकरच पांढरा कुत्रा त्याना येवून मिळतो आणि ते सज्ज होतात पुढच्या शिकारीसाठी. प्रेत, घुबड आणि वटवाघळे झाडांवर जाऊन बसतात. तो प्राणी आणि कुत्रा पुन्हा त्या चन्द्रप्रकाशाताल्या मैदानात येतात! दुरून एक शववाहिनी येत असतांना त्याना दिसते. कुत्रा आणि तो प्राणी त्या शववाहिनीच्या समोर येवून थांबतात..!!
(समाप्त)
प्रतिक्रिया
26 Feb 2015 - 3:39 pm | सामान्य वाचक
डोके भंजाळले
26 Feb 2015 - 3:57 pm | कपिलमुनी
निर्वाण प्राप्त झाले आहे.
26 Feb 2015 - 4:02 pm | स्पा
26 Feb 2015 - 4:08 pm | सविता००१
खलास झाले वाचून. खरंच भंजाळलं डोकं.
26 Feb 2015 - 6:34 pm | विजुभाऊ
मै कहां हुं?
26 Feb 2015 - 7:30 pm | hitesh
.
26 Feb 2015 - 8:58 pm | अर्धवटराव
कथा नक्की तुम्हीच लिहीली आहे का?
26 Feb 2015 - 9:09 pm | निमिष सोनार
तुम्हाला शंका का अाली?
26 Feb 2015 - 9:41 pm | अर्धवटराव
:)
26 Feb 2015 - 9:35 pm | योगी९००
काय कळलं नाही बुवा. नंतर नंतर तर कुत्रं,बैल, विचित्र प्राणी, बाबू, साबू, होयबा, नायबा, ओबामा,प्रेत, पक्षी यांच्यापैकी गुढ कोण हेच कळत नव्हतं...बहुतेक गुढ काय हे शोधणं हेच एक प्रकारचं गूढ असावं.
26 Feb 2015 - 11:56 pm | आतिवास
भलतीच गूढ आहे कथा!
मला तर काहीही कळली नाही.
सगळं गूढ!!
27 Feb 2015 - 12:05 am | रेवती
काही कळले नाही बुवा! तुम्ही म्हणालात म्हणून गूढकथा आहे हे समजले, नैतर..........
27 Feb 2015 - 12:20 am | विनोद१८
4 Mar 2015 - 8:59 am | खटासि खट
वारेंचं पण योगदान आहे का यात ?
27 Feb 2015 - 12:21 am | संदीप डांगे
ही कथा म्हणजे अगदी रिडले स्कॉटच्या दिग्दर्शनाच्या शैलीत जाणारी आहे. फक्त भारावून टाकणारे विज्युअल्स लिहायचे मग तुकडे एकत्र करुन त्याला कथा म्हणायचे... प्रचंड भन्नाट दृश्यांचे फक्त अगम्य तुकडे... उदा.: प्रोमेथीअस.
4 Mar 2015 - 9:00 am | खटासि खट
रिडले स्कॉटच्या दिग्दर्शनाच्या शैलीत >> प्रचंड माहीती आहे तुमच्याकडे.
27 Feb 2015 - 1:21 am | खटपट्या
एका कागदावर कुत्रं,बैल, विचित्र प्राणी, बाबू, साबू, होयबा, नायबा, प्रेत, पक्षी यांची नावे लिहीली आणि कथा वाचत वाचत त्यांचे स्थान पक्के केले.... मग कुठे थोडेसे कळाले.
27 Feb 2015 - 7:52 am | निमिष सोनार
इतकी खटपट केली हे वाचून बरे वाटले
27 Feb 2015 - 7:08 am | निमिष सोनार
तुम्हाला शंका का अाली?
27 Feb 2015 - 8:14 am | पुणेकर भामटा
निद्रानाषावर आक्सिर इलाज, स्वानुभवातुन सान्गतो.
27 Feb 2015 - 8:34 am | फोटोग्राफर243
शेवटी, कोणी कोणाची शिकार केली? माफ करा पण कथा पार डोक्या वरुन गेली....
27 Feb 2015 - 10:31 am | कॅप्टन जॅक स्पॅरो
रामगोपाल वर्मा एका नव्या चित्रपटासाठी स्क्रिप्ट शोधत आहेत. कृपया आपली कथा पाठौन सक्रिय सहानभुती देणे.
27 Feb 2015 - 11:01 am | नाखु
"जीमो" रूपांतर
"ज्योअ" विभ्रम भाषांतर
"अकु"संस्करण करेल तो खरा समी(भि)क्षक.
अखिल मिपा भरताड लेखनपिडीत वाचक बचाव संघातर्फे
चणे-फुटाणे वाचक नाखु.
27 Feb 2015 - 11:14 am | स्पा
नशीब धारप हे वाचण्या आधीच वर गेले
3 Mar 2015 - 5:51 pm | अत्रुप्त आत्मा
@नशीब धारप हे वाचण्या आधीच वर गेले >> =)))))
अस्सल प्रति क्रीया! =))
27 Feb 2015 - 11:03 pm | धडपड्या
अर्रर्रर्र... दोन दिवसात, चार पाच वेळा वाचली.. तरी पण नव्हती कळाली... आता जरा दिलासा वाटतोय, की मीच एकटा नाहीये...
28 Feb 2015 - 12:05 am | एस
'ऐसी अक्षरे' चाळत असताना तिथे आधी वाचली. कथा आवडली. पण बरीचशी नाटकाच्या संहितेसारखी वाटली. थोडे संस्करण केल्यास उत्तम गूढकथा/भयकथा होऊ शकेल.
2 Mar 2015 - 10:51 am | निमिष सोनार
आवडेल असा माझा आशावाद आहे.
3 Mar 2015 - 5:03 pm | कपिलमुनी
तुम्हास मिपाचे केआरके या सन्मानाने गौरवण्यात येत आहे
4 Mar 2015 - 5:59 pm | आदूबाळ
=)) __/\__
3 Mar 2015 - 6:59 pm | सानिकास्वप्निल
काय लिहिले काsssही कळले नाही.
4 Mar 2015 - 7:23 am | सांजसंध्या
एकदा वाचली. मग होयबा आणि नायबा या नावांचा सकारात्मकता आणि नकारात्मकता याच्याशी संबंध लावून पाहीला. कुत्रा, प्राणी या उपमा काही सांगतात काय हे पहायला गेले आणि आधीपेक्षा जास्त कन्फ्युज झाले. पण बघूयात यातून काही काढता आले तर..
4 Mar 2015 - 6:09 pm | निमिष सोनार
काहीतरी नवनवीन मिळेल.