कधी कधी

हसी तो फसी या हिंदी सिनेमातलं 'ज़हनसीब' हे अत्यंत आवडतं गाणं ऐकत असताना सुचत गेलेल्या ओळी. विडंबन नाही, पण ज़हनसीब च्या चालीवर बसणारी ही कविता.

कधी कधी
कधी कधी
मी गातो एकट्याने
कधी कधी

अजूनही
अजूनही
आठवते एक गाणे
कधी कधी धृ

कधी काळी त्या ओळी माझ्या मला वाटल्या
मनाच्या गोष्टीही त्या शब्दांमध्ये दाटल्या
धूळीच्या राशी त्या दिवसांवर आता साठल्या
तरी पुन्हा
तरी पुन्हा
उलगडतो तीच पाने
कधी कधी १

कधीतरी वाटेवरती जेंव्हा मी विसावतो
उगाचच मागे का मी तेंव्हा वळून पाहतो
अजूनही कुणाला तरी शोधत असा राहतो
खुणवती
खुणवती
ती हिरवी गर्दराने
कधी कधी २

कधी कधी नकळत होतो थोडासा उशीर अन
अनोळखी चेहरे ही मग देती कधी धीर अन
चहुकडे बघता बघता होतो मी अधीर अन
हरवतो
बघुनिया
चमचमती ती दुकाने
कधी कधी ३

कधी मग दरबारी अन प्याला वाटतो हवा
अन कधी भैरवीतही ऐकू येई मारवा
कधी ठेका त्या इंग्रजीचाही हवा हवा
उमगती
उमगती
गज़लाही त्या नव्याने
कधी कधी ४

कधी कधी
कधी कधी
मी गातो एकट्याने
कधी कधी

अजूनही
अजूनही
आठवते एक गाणे
कधी कधी

कधी कधी
कधी कधी
मी गातो एकट्याने
कधी कधी

- अपूर्व ओक