पानावरच्या दवबिंदूपरी
सजते, निसटुनिया विरते
ऊन - सावली नाते अपुले
कधी हसते अन् कधी रुसते
कधी हिरवाईच्या मखमाली
भिरभिरते अन् बागडते
कधी काहिली, कधी होरपळ
कधी पेटुनी धगधगते
कधी पौर्णिमेच्या चंद्रापरी
चमचमते अन् लखलखते
कधी गर्द अवसेच्या राती
काळोखातुन पाझरते
लडीवाळ कधी मोरपिसापरी
हळुच कानी कुजबुजते
कधी अनावर प्रपातापरी
दुमदुमते अन् कोसळते
कधी मौनाच्या बंद क्षणांनी
हिरमुसते अन् मुसमुसते
कधी शब्दांच्या पागोळ्यातुन
गहिवरते अन् रिमझिमते
विरहाच्या एकांती नाते
उष्ण आसवांनी भिजते
गंध मोगर्या मीलन राती
फुलून गात्री दरवळते
नात्याची ही वेल आपुली
बावरते, कधी सावरते
स्पर्शलाजर्या हिंदोळ्यावर
झुलते आणिक सुखावते.
जयश्री अंबासकर
प्रतिक्रिया
8 Nov 2012 - 12:32 pm | जेनी...
:)
गोड आहे एकदम .:)
8 Nov 2012 - 3:33 pm | दिपक.कुवेत
हाय जयश्रि
कविता छानच आहे. मीपा वरचा पहिला वहिला प्रतिसाद...छान वाटतय आपल्या भाषेत लिहायला.
9 Nov 2012 - 4:27 am | स्पंदना
आह! काय फोटो निवडलाय. अन कविता कशी रुणझुणत येते. मस्ताड!
9 Nov 2012 - 4:32 am | रेवती
फारच गोड.
9 Nov 2012 - 5:39 am | अत्रुप्त आत्मा
मस्त. :-)
9 Nov 2012 - 9:24 am | ज्ञानराम
खूपच छान
9 Nov 2012 - 9:24 am | ज्ञानराम
खूपच छान
9 Nov 2012 - 11:11 am | संजय क्षीरसागर
निकनेम माहिती नसल्यानं पोस्ट उघडणार नव्हतो पण इतके लगोलग प्रतिसाद म्हटल्यावर काय आहे ते बघू, तर.. वॉट अ लव्हली सप्राइज! धन्यवाद
9 Nov 2012 - 2:18 pm | जयवी
मनापासून धन्यवाद :)
9 Nov 2012 - 5:08 pm | सूड
छान लिहीलंय.
10 Nov 2012 - 3:53 am | मीनल
खूप खूप छान
13 Nov 2012 - 1:57 pm | अभ्या..
खूप आवडली. खूप छान फ्लो आहे.
13 Nov 2012 - 7:52 pm | दादा कोंडके
कविता वाचताना "मायेच्या हळव्या" हे गाणं आठवलं.
13 Nov 2012 - 8:29 pm | कौस्तुभ आपटे
सुंदर