खट्टी-मिठी कैरीची कोशिंबीर

१) छोट्या कैर्‍या ५-६ मोठ्या असतील तर १-२
नुसती कैरी पाहूनच तोंपासु की नाही!:स्मित:

२) १ मोठा चमचा मिठ
३) १ मोठा चमचा साखर
४) पाऊण चमचा लाल मसाला किंवा लाल तिखट
५) १ चमचा गोडे तेल

पाककृती
१) प्रथम कैर्‍यांचा सुगंध घेत घेत कैर्‍यांची साले सुरीने काढा. छोट्या कैर्‍या असल्यास त्याचे दोन भाग करून कोय काढून टाका. बाठेवाल्या असल्यास तशाच किसण्यासाठी ठेवा, किसुन झाल्यावर बाठे टाकता येतात.

२) आता कापलेल्या कैर्‍या किसून घ्या. ही प्रक्रिया करताना तोंडाला पाणी सुटणे, लहान मुलांनी मध्येच कैर्‍या पळवणे असे प्रकार होऊ शकतात. अगदीच अनावर झाल्यास एखादा तुकडा तोंडात टाका. :स्मित:

३) किसामध्ये मिठ, मसाला, साखर टाकुन एक चमचा कच्च्या तेलाची धार सोडा (कच्च्या तेलाची म्हणजे न तापवता वगैरे). हा किस हाताने एकजीव करा म्हणजे तुमच्या हाताची चवही त्याला येईल. पण न राहवून बोटे तोंडात जाणार नाहीत याची काळजी घ्या :हाहा: धिर असेल तर थोडा वेळ मुरवत ठेवा म्हणजे पाणी सुटेल आणि रसाळ लज्जतदार, मसालेदार कोशिंबीर तयार होईल.

हा मी अधीरपणाने न मुरवाता काढलेला तयार कोशिंबीरीचा फोटो.

अधीरपणाने काढण्याचे कारण ह्या फोटोवरून समजेलच :स्मित: आमची बच्चेकंपनी मुरायच्या अधीच तुटून पडली होती कोशिंबीरीवर.

अधिक टिपा:
विशेष टिप म्हणजे मुलांना आधी सांगूच नका हा प्रकार करणार आहात नाहीतर तुमच्या पाककृतीत मध्ये मध्ये अडथळे येतील :हाहा: मुलेच काय काही मोठी माणसेही अडथळा आणतात घाई करुन.

जर साखर मिठाचे प्रमाण कमी वाटले तर नंतर थोडे टाकावे.

मसाला असला तरी हा प्रकार मुले आवडीने खातात.

तेल आवडत नसल्यास नाही टाकले तरी चालेल.

लाल तिखट असल्यास पाव चमचा पुरे.