शब्दांना नसते वय
शब्दांना कसले भय!
शब्दांना उलगडताना
शब्दातच मिळते लय!!
शब्दांत सुख आभास
शब्दांत वेदना खास!
शब्दावीण घुसमट होते
शब्दात मोकळा श्वास!!
शब्दा-शब्दांचा मेळ
शब्दांचा चाले खेळ!
शब्दांच्या नभात होते
शब्दांची चांदणवेळ!!
शब्दांतून व्हावे व्यक्त
शब्दात उरावे फक्त!
शब्दांतून देव घडावा
शब्दात मिळावा भक्त!!
शब्दांचा कैसा थाट
शब्दांची पोच अफाट!
शब्दांनी बहरुन जाते
शब्दांची पाउलवाट !!
शब्दांची पडते भूल
शब्दांत गूढ चाहूल!
शब्दांचा भ्रमर फिरावा
शब्दांत उमलता फूल!!
शब्दांत क्लेश आनंद
शब्दांत वृत्त अन् छंद!
शब्दात मोकळे व्हावे
शब्दातच व्हावे बंद!!
शब्दांस सुरांचे माप
शब्दांत तान आलाप!
शब्दांत प्रेम आईचे
शब्दात ओरडे बाप!!
शब्दातच गझल-अभंग
शब्दातच ओवी दंग!
शब्दातच फिके पडावे
शब्दात सापडे रंग!!
शब्दातच अल्ला-राम
शब्दातच भक्ती ठाम!
शब्दात फिरावे स्वैर
शब्दातच अल्पविराम!!
शब्दात अर्थ उलगडतो
शब्दाविण जन्मच अडतो!
शब्दांची पेरण होते
शब्दांचा पाऊस पडतो!!
शब्दांच्या गावा जावे
शब्दातच नित्य रहावे!
शब्दांना गुणगुणताना
शब्दांचे गाणे व्हावे!!
- केतन पटवर्धन
प्रतिक्रिया
17 Oct 2017 - 3:28 pm | Mahesh Bhalerao
वा ! शब्दांनी शब्दात माळलेली एक सुंदर कविता !
17 Oct 2017 - 9:48 pm | वेल्लाभट
सुरेख कविता ! !
17 Oct 2017 - 10:08 pm | पलाश
शब्द, लय, अर्थ सर्वकाही आवडले. सुरेख.
18 Oct 2017 - 1:43 am | रुपी
सुरेख!
20 Oct 2017 - 1:56 pm | माम्लेदारचा पन्खा
आवडली कविता . . . .
20 Oct 2017 - 2:59 pm | पद्मावति
सुंदर कविता.
23 Oct 2017 - 12:13 pm | सस्नेह
छान कविता !
23 Oct 2017 - 12:39 pm | विनिता००२
मस्त जमलिये
24 Oct 2017 - 8:45 am | प्राची अश्विनी
अतिशय सुंदर!
24 Oct 2017 - 2:38 pm | मित्रहो
लय मस्त आहे.
24 Oct 2017 - 5:03 pm | पाटीलभाऊ
छान कविता
24 Oct 2017 - 5:54 pm | सिरुसेरि
+१ . शब्द शब्द जपुनी ठेव आठवले .
30 Oct 2017 - 6:21 pm | पैसा
आवडली
31 Oct 2017 - 6:39 pm | पुंबा
अहाहा!!
हे सुंदर शब्दचित्र कसे काय मिसले गेले. फार आवडली कविता.
शब्दांत सुख आभास
शब्दांत वेदना खास!
शब्दावीण घुसमट होते
शब्दात मोकळा श्वास!!
हे तर खासच!!